विर्तामोड । झापाको मेचीनगर नगरपालिका ६ मेचीखोला छेउबाट ठूलो परिमाणमा चाँदी र तामाको सामानसहित २ जना पक्राउ परेका छन् ।
आईतवार अपरान्ह ईलाका प्रहरी कार्यालय काँकडभिट्टाबाट खटिएको प्रहरी टोलीले काठमाण्डौ महानगरपालिका ६ बौद्धका ३४ वर्षीय अजित नगरकोटी र काठमाडौ १ का ३८ वर्षीय श्याम सुनुवारलाई पक्राउ गरेको हो ।
चाँदी र तामाका सामानसहित उनीहरुलाई पक्राउ गरेको इलाका प्रहरी कार्यालयले जनाएको छ । नगरकोटी र मुखियाको साथबाट प्रहरीले ११ केजी ९०० ग्राम बराबरको चाँदीका सामान र २१ केजी बराबरको तामाका सामान बरामद गरेको हो ।
पक्राउ परेका मानिस तथा सामानसमेत आवश्यक कारवाहीको लागि मेची भन्सार कार्यालय काँकडभिट्टामा बुझाईएको प्रहरीले जनाएको छ ।
