विराटनगर । नेकपा माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले कोशी प्रदेशमा छैटौं सरकार बन्नुमा प्राप्त जनादेश र केन्द्रको समीकरण फेरबदल नै मुख्य भएको बताएका छन् ।
विश्वासको मत लिने प्रयोजनका लागि चलिरहेको प्रदेशसभा बैठकमा सम्बोधन गर्दै उनले यस्तो बताएका हुन् । उनले यस प्रक्रियाका कारण प्रदेशका जनता खुसी नभएको पनि उनले बताए ।
आगामी दिनमा जनतालाई आशा जगाउने गरी कार्की नेतृत्वको सरकार अगाडि बढ्ने उनले विश्वास गरे । बहुमतले सरकार चलाएर अल्पमतले सरकारलाई आलोचना गरेर प्रतिपक्षमा बस्ने सविधानको व्यवस्था रहेको उनले बताए । तत्कालिन मुख्यमन्त्री केदार कार्कीले कि विश्वासको मत लिने या राजीनामा गर्ने दुवै विकल्प भएपनि त्यस्तो नभएको कारण अर्को सरकार बनाउनु परेको उनले बताए । ‘संसदीय प्रणाली र संवैधानिक व्यवस्थाको आधारमा राजीनामा पनि नदिने, विश्वासको मत पनि नलिने भन्ने कुरा कसरी कल्पना गरेको होला ?,’ उनले भने, ‘काँग्रेस जस्तो लोकतान्त्रिक पार्टीले त झन् त्यो गर्न मिल्ने अवस्था नै होइन ।’
नयाँ सरकार बनाउने कुरा प्रदेशसभा र सांसदको जिम्मामा रहेको बताउँदै उनले अदालतमा परेको मुद्दाको फैसलालाई आफूले मान्ने जानकारी दिए । ‘अदालतले दिएको फैसलालाई हामीले मान्नुपर्छ । अदालतमा जाने कुरालाई हामीले अन्यथा मानेका छैनौं,’ आङ्बोले भने, ‘तर, अदालतले कारण देखाउ आदेशमा सरकारले गर्ने नियमित काम र संसदले गर्ने काममा अवरोध गरेको छैन । त्यसो हुँदा संसदमा सहभागी नहुनु, विश्वासको मत लिने कुरामा संसदमा नआउनु भनेको दुःखद कुरा पनि हो ।’ काँग्रेसले संसदमा नआउने भनेर गरेको कदमलाई स्वभाविक रुपमा लिन नसकिने पनि उनले बताए ।
