विराटनगर । कोशी प्रदेशका मुख्यमन्त्री केदार कार्कीले संविधानको धाराा १८८ को २ अनुसार सरकारमा सहभागी दल र सांसदले समर्थन फिर्ता लिएको ३० दिनभित्र विश्वासको मत नलिएको कारण नयाँ सरकार गठनको प्रक्रिया उनले राजीनामा नदिए पनि अगाडि बढ्ने भएको छ ।
प्रदेशसभाले पारित गरेको संकल्प प्रस्ताव अनुसार तोकिएको अबधिभित्र मुख्यमन्त्री कार्कीले प्रदेशसभामा आफूमाथि विश्वास छ भन्ने प्रस्ताव अगाडि बढाउन सूचना नदिएको पत्र प्रदेशसभा सचिवालयले प्रदेश प्रमुखलाई पठाएको छ । सोही पत्र र महान्यायाधीवक्ता कार्यालयको रायसमेतका आधारमा नयाँ सरकार गठनको आह्वान हुने भएको हो ।
नेकपा एमाले र नेकपा माओवादी केन्द्रले सरकारमा सहभागी दल र सांसदले २०८० चैत २६ गते सरकारलाई दिएको समर्थन र विश्वासको मत फिर्ता लिइसकेको अवस्थामा २०८१ वैशाख २५ गतेभित्र मुख्यमन्त्री कार्कीले प्रदेशसभाबाट विश्वासको मत लिनुपर्नेमा नलिएकोले स्वतः पदमुक्त भएको भन्दै नयाँ सरकार गठनको प्रक्रिया थाल्न प्रदेश प्रमुखलाई पत्र बुझाएका छन् । पत्रमा एमाले संसदीय दलका नेता हिक्मतकुमार कार्की र माओवादी केन्द्र संसदीय दलका नेता इन्द्रबहादुर आङ्बोको हस्ताक्षर छ ।
प्रदेश प्रमुखको कार्यालयले पछिल्लो परिस्थितिबारे कानुनी र संवैधानिक परामर्श भइरहेको जनाएको छ । दुई दलको पत्र, मुख्यमन्त्रीले विश्वासको मत नलिएको भन्दै प्रदेशसभा सचिवालयले दिएको जानकारी र त्यसबारे महान्यायाधीवक्ता कार्यालयले दिएको रायसमेतको आधारमा प्रदेश प्रमुखले नयाँ सरकार गठनको आह्वान गर्ने स्रोतले जनाएको छ । सरकार रिक्तताको अवस्था रहन नसक्ने भएकोले मुख्यमन्त्रीले विश्वासको मत नलिएर पदमुक्त भएको दिन नै नयाँ सरकार गठनको आह्वान गर्नुपर्ने देखिएको प्रदेश प्रमुख निकट स्रोतले जनाएको छ ।
प्रदेश प्रमुखले महान्यायधीवक्ताको राय मागेर पत्र पठाएकोमा त्यसको जवाफ आइसकेको छैन । महान्यायधीवक्ताको राय आइसकेपछि प्रदेश प्रमुखले आवश्यक निर्णय गर्ने निकट स्रोतले जनाएको छ ।
स्रोतको अनुसार प्रदेश प्रमुखले संविधानको धारा १६८ को उपधारा ५ अनुसार नयाँ सरकार गठनको लागि आह्वान गर्नेछन् । नयाँ सरकार गठनको आव्हानलगत्तै एमाले र माओवादीका सांसदहरुले नेकपा एमाले संसदीय दलका नेता हिक्मतकुमार कार्कीलाई मुख्यमन्त्री बनाउन हस्ताक्षरसहित दावी पेश गर्ने तयारी गरेका छन् ।
प्रदेशसभाको बहुमत सांसदको हस्तक्षरसहित दाबी गर्ने आफूहरूको तयारी रहेको एमाले कोशीका प्रमुख सचेतक रेवतीरमण भण्डारीले जानकारी दिए । त्यसको लागि आवश्यक परेमा सांसदहरुलाई सनाखत गराउन पनि तयारी अवस्थामा राखिएको दुई दलका नेताहरुले बताएका छन् ।
कोशी प्रदेशका मुख्यमन्त्री केदार कार्कीले संविधानको धारा १८८ को उपधारा २ अनुसार विश्वासको मत नलिएपछि एमाले–माओवादी नयाँ सरकार गठनमा लागेका हुन्। यता, नयाँ सरकार गठनको विषयमा अहिले नै टुंगो नभएको प्रदेश प्रमुखको सचिवालयले जनाएको छ।
फायल फोटो
