विराटनगर । मोरङको रंगेलीमा एक वृद्धा महिलालाई बोक्सीको आरोपमा छिमेकीले सामुहिक रुपमा निर्घात कुटपिट गरेका छन् । रंगेली–२ बवियाबिर्ताकी ६८ वर्षीय मानती देवी साहलाई छिमेकी ३० वर्षीय रिङ्कीदेवी साहसहितका आफन्तहरूले सामूहिक रूपमा निर्घात कुटपिट गरेका हुन् ।
कुटपिटबाट घाइते भएकी वृद्धा मानतीको उपचार विराटनगरस्थित कोशी अस्पतालमा उपचार भइरहेको छ । उनको अवस्था चिन्ताजनक रहेको अस्पतालले जनाएको छ । बोक्सीको आरोप लगाउँदै मानतीलाई रिङ्कुदेवीसहित उनका देवर कृष्ण साह, सञ्जय साहसहित ६÷७ जनाले निर्घात कुटपिट गरेको पीडित मानतीको छोरा शिवकुमार साहले बताए । सामूहिक रुपमा मानतीलाई आधा दर्जनले कुटपिट गरेपनि प्रहरीले रिङ्कुदेवीलाई मात्र पक्राउ गरेको छ । इलाका प्रहरी कार्यालय रंगेलीले रिङकुदवीलाई पक्राउ गरि मोरङ अदालतमा म्याद थप गरि अनुसन्धान सुरु गरेको मोरङ प्रहरीका प्रवक्ता डिएसपी दिपक श्रेष्ठले जानकारी दिए ।
घाइते भएकी मानतीदवेवीको दुई छोरा र तीन छोरी छन् । ‘१५ माघमा राती रिङ्कुदेवीसहितका उनका देवरसहित ६÷७ जना आएर हाम्रो छोरालाई खाईस भन्दै सुतेको आमालाई ओछ्यानबाट तान्दै आगनमा ल्याएर निर्घात कुटपिट गरे,’ आमाको उपचार खटिएका कान्छा छोरा शिवकुमारले भने, ‘त्यस दिन म घरमा थिइँन । आमालाई आगनमा ल्याएर सामूहिक रुपमा कुटपिट गरेका थिए । आमाले पानी माग्दा यस्तो बोक्सीलाई पानी दिनु हँुदैन भन्दै थुक्दै झन् कुटपिट गर्न थालेका रहेछन् ।’ आमालाई थप पीडा भएर पानी पानी भन्न थालेपछि रिङ्कुसहित उनका देवर सञ्जय र कृष्णले अगरबत्ती मुखमा झोसिदिएको छोरा शिवको भनाइ छ । घाइते मानतीदेवीको घरदेखि करिब रिङ्कीदेवीको १ सय मिटर दक्षिणमा पर्दछ । रिङ्कुदेवीको तीन साता अगाडि आफन्तको नवजात शिशुको मृत्यु भएको थियो । छोरा जन्म भएको रिङ्कुदेवीको आफन्तले नवजात शिशु खाईस भन्दै निर्घात कुटपिट गरेको शिवकुमारले बताए ।
‘गाउँमा अरुलाई पनि बोक्सी मन्त्र लगाइस् एर संकटमा पारिस भन्दै जथाभावी कुटपीट गर्न थाले,’ पीडित छोरा शिवले भने, ‘लठ्ठीले हान्दा आमाको शरिरभरी चोटपटक लागेको छ ।’
बोक्सीको आरोप लगाउँदै सामूहिक रुपमा कुटपिट गरेको मानतीदेवी कोशी अस्पतालको उपचार कक्षमा गम्भीर अवस्थामा छिन् । कुटपिटबाट घाइते भएकी साहलाई स्वाप्रश्वासमा समस्या रहेको छ । उनको शरिरमा चोट पटक र जीउ भरी निलडामहरु छन् । घाइते साहको आर्थिक अवस्था ज्यादै नाजुक भएकोले औषधी उपचार गर्न समेत नसकेको पीडितकी आफन्तले बताएका छन् ।
आक्रमण गर्ने सबैलाई पक्राउ गरि कारवाहीको माग
बोक्सीको आरोप लगाउँदै आमालाई सामूहिक रुपमा निर्घात कुटपिट गर्ने सबैलाई पक्राउ गरि कानुनी कारवाहीको दायरामा ल्याउनुपर्ने पीडित परिवारको माग छ । प्रहरीले ६८ वर्षीय वृद्धा मानतीदेवी साहलाई बोक्सीको आरोपमा कुटपिट गरेको भन्दै छिमेकी रिङ्कुदेवीलाई मात्र पक्राउ गरेको छ ।
घाइतेका छोरा शिवकुमारले आमालाई बोक्सी भन्दै निर्घात कुटपिट गर्ने कृष्ण साह, सञ्जय साहसहित सबैलाई पक्राउ गरि कारवाहीको दायारमा ल्यानुपर्ने बताए । ‘प्रहरीले अहिले घटनामा एक जनालाई मात्र पक्राउ गरेको छ,’ उनले भने, ‘आमालाई यसरी मरणसन्न हुने गरि कुटपिट गर्ने सबैलाई पक्राउ गरि कानुनी दायरामा ल्याउनुपर्दछ । अहिलेसम्म अन्यलाई पक्राउ गरेको छैन ।’ आमालाई बोक्सी भन्दै कुटपिट गर्ने कृष्ण र सञ्जय गाउँघरमै रहेको उनको भनाइ छ ।
यता मोरङ प्रहरीका प्रवक्ता डिएसपी दिपक श्रेष्ठले घटनामा एक जना पक्राउ गरि अदालतमा म्याद थप गरि अनुस्न्धान भइरहेको बताए । ‘अहिले यस घटनाको अनुसन्धान भइरहेको छ,’ उनले भने, ‘घटनामा संलग्न पक्राउ पर्नेछन् ।’
