उर्लाबारी । मोरङ उर्लाबारी ९ का किसान टेकबहादुर कटुवालले पालेको पाँच वटा खसी अचानक मरेको छ । बिक्री योग्य भइसकेको पाँच वटा खसी मरेपछि किसान कटुवाललाई झण्डै १ लाख रुपैयाँ भन्दा बढी नोक्सानी भएको छ ।
उर्लाबारी ९ भोटेपुलका टेकबहादुर कटुवालले खसीलाई घाँस ल्याउँदा नचिनेर ल्याएको उल्टी झार नामको स्याउला खाएपछि खसी मरेका हुन् । उक्त घाँस खाएपछि खसीको पेट फुलेको थियो भने उपचार गर्न नपाउँदै भटाभट मरेको थियो ।
उल्टी झारलाई विषालु झार मानिन्छ र यसको काँडा उल्टो हुन्छ । लज्जावन्ति झार जस्तै देखिने झार दमक स्थित हिमालय चिया बगान वरिपरी लगाइएको छ । पशुचौपायले चिया बगानमा नोक्सानी गरेपछि त्यसलाई रोक्न यो झार लगाइएको बतायएको छ । यो झार रतुवा र मावा खोला किनारमा पनि पाइने गरेको स्थानीयबासीहरुले बताएका छन् ।
अचानक खसी मरेपछि स्थानीय युवा लोलिम पोमुले उर्लाबारी नगरपालिकामा खबर गर्नुभएको थियो । नगरपालिकाबाट कृषि शाखाबाट बिष्णु भट्टराईसहितको टोली घटनास्थलमा पुगेको थियो । लक्षणहरुको अध्ययन गर्दा फुड पोइजनका कारण खसी मरेको र अन्य रोगका कारण घटना नभएको पाइएको भट्टराईले बताउनुभयो ।
तस्बिर : तेजन खड्का
