खोटाङ । बचतकर्ताको रकम घोटला गरेको भन्दै खोटाङको दिक्तेलस्थित लालुपाते बहुउद्देश्यीय सहकारी संस्थाका उपाध्यक्ष अर्जुन चौलागाईंसहित थप पाँचजनालाई प्रहरीले पक्राउ गरेको छ ।
जिल्लाका ४ हजार ५०० भन्दा धेरै बचतकर्ताको रकम घोटला प्रकरणमा सञ्चालक समितिका तत्कालीन अध्यक्ष अनिल जोशीसहित तीन जना यसअघि नै पक्राउ परिसकेका छन् । प्रहरीले सो प्रकरणमा उपाध्यक्ष चौलागाईं, सचिव मनोज राई, कोषाध्यक्ष रमा शाक्य, लेखा समिति संयोजक प्रितम श्रेष्ठ र लेखापाल सुमना राईलाई आइतबार पक्राउ गरेको हो ।
सहकारीमा भएको आर्थिक अनियमितता प्रकरणमा मुछिएका व्यक्तिमाथि थप अनुसन्धान गर्न सञ्चालक समितिका पदाधिकारीलाई नियन्त्रणमा लिएको जिल्ला प्रहरी कार्यालय खोटाङका प्रवक्ता प्रहरी निरीक्षक बेनु कार्कीले जानकारी दिए । नियन्त्रणमा लिइएका सञ्चालक समितिका पदाधिकारीलाई आइतबार नै जिल्ला अदालत खोटाङमा हाजिर गराएर म्याद थप गरि अनुसन्धान सुरु गरिएको छ ।
आफूहरुले जम्मा गरेको बचत डुबाएको भन्दै बचतकर्ताले गत वर्षको फागुन २ गते सञ्चालक समितिका तत्कालीन अध्यक्ष जोशीको परिवारका पाँचजना सदस्यसहित ८ जनाविरुद्ध जिल्ला प्रहरी कार्यालय खोटाङमा जाहेरी दिएका थिए । जाहेरीको आधारमा प्रहरीले अध्यक्ष जोशीका भाइ सुनिल जोशी र श्रीमती रविना श्रेष्ठलाई गत असोज १३ गते तथा प्रबन्धक रुकु जोशीलाई असोज १७ गते काठमाडौँबाट पक्राउ गरेको थियो ।
महिना दिनअघि काठमाडौँबाट पक्राउ परेका तीनैजनालाई प्रहरीले जिल्ला प्रहरी कार्यालय खोटाङको प्रहरी हिरासतमा राखेर अनुसन्धान भइरहेको छ । पक्राउ परेका सुनिल श्री एयरलायन्सका क्याप्टेनसमेत हुन् ।
उनीहरुको परिवारले सहकारीबाट १ करोड ५० लाखभन्दा बढी ऋण चलाएको पाइएको छ । यस्तै सहकारीको नाममा खरिद गरिएको भनिएको जग्गा तत्कालीन अध्यक्ष जोशीको परिवार तथा आफन्तको नाममा राखेको पाइएको छ ।
२०७२ मङ्सिर १० गतेदेखि दिक्तेल बजारमा कार्यालय स्थापना गरेर कारोबार सुरु गरेको सहकारीको बचत अपचलन भएको विषय तत्कालीन अध्यक्ष जोशीको निधनपछि खुलेको थियो । जोशीको कोभिड–१९ को सङ्क्रमणका कारण विसं २०७८ वैशाख १५ गते पोखरामा निधन भएको थियो ।
जोशीको निधनपछि विसं २०७८ वैशाख १६ गतेदेखि सहकारीको आर्थिक कारोबार ठप्प छ । सहकारीमा एकैजनाले ४५ लाख रुपैयाँसम्म बचत गरेका थिए । सहकारीमा ७४ जना ऋणी रहेका छन् । ऋणीहरुले न्यूनतम रु ३० हजारदेखि रु ७५ लाखसम्म ऋण लगेको देखिएको लेखा परीक्षण प्रतिवेदनमा उल्लेख छ ।
सहकारीको जग्गाबाहेक साँवाब्याजसहित करिब १० करोड ऋण लगानी रहेको जनाइएको छ । बचतकर्तालाई साँवाब्याजसहित करिब ७ करोड फिर्ता दिनुपर्ने लेखा परीक्षण प्रतवेदनमा देखिएको छ ।
बचतकर्ताले आफूहरुको बचत डुबाउने दोषीलाई कारबाही र डुबेको बचत फिर्ता गर्न माग गर्दै गत असोज १९ गते जिल्ला प्रहरी कार्यालय र जिल्ला अदालत खोटाङमा धर्ना दिएका थिए । जिल्लामा १८१ सहकारी संस्था सञ्चालनमा छन् ।
