विराटनगर । इलाम उपनिर्वाचनमा ५७ प्रतिशत मतदान भएको छ । इलामका प्रमुख जिल्ला अधिकारी इन्द्रदेव यादवले दिएको जानकारी अनुसार एक लाख १५ हजार आठ सय ८९ जना मतदाता रहेकोमा ६६ हजार अर्थात् ५७ प्रतिशत मतदान भएको हो ।
मतदान शान्तिपूर्ण रुपमा सम्पन्न भएको छ । इलाम २ का ७९ मतदानस्थल र एक सय ४९ मतदान केन्द्रलाई संबेदनशिल मानिए पनि शान्तिपूर्ण रुपमा मतदान सम्पन्न भएको हो । २०७९ को संघीय निर्वाचनमा इलाम २ मा ६२ प्रतिशत मत खसेको थियो ।
आज बिहान ७ बजेदेखि मतदान सुरु भएको थियो । मुख्य निर्वाचन अधिकृत केशव घिमिरेका अनुसार मतदान सम्पन्न गर्नका लागि सात सय ४५ जना कर्मचारी र तीन हजार सुरक्षाकर्मी परिचालन गरीएको थियो । इलामका प्रमुख जिल्ला अधिकारी इन्द्रदेव यादवले शान्ति सुरक्षामा अति सजगता अपनाएका कारण सहज रुपमा मतदान सकिएको जानकारी दिए ।
आजै रातीसम्ममा मतपेटीका संकलन गरिसक्ने र भोली बिहान (आइतबार बिहान) सर्वदलीय बैठक बसेर मतगणना सुरु गरिने यादवले बताए । इलाम सदरमुकामस्थित गौतमबुद्धसभा हलमा मतगणना गरिने भएको छ । मतगणनास्थलमा तारबेरा गरिनुको साथै सीसी टिभी जडान गरिएको छ । मतगणना दुई स्थानमा हुनेछ ।
निर्वाचनमा एमालेबाट सुवास नेम्वाङका छोरा सुहाङ नेम्वाङ, काँग्रेसका डम्बर खड्का, राष्ट्रिय स्वतन्त्र पार्टीका मिलन लिम्बू र पहिचानवादीका डकेन्द्रसिंह थेगिमबीचमा कडा प्रतिस्पर्धा हुने अनुमान गरिएको छ । उम्मेद्वारको संख्या भने राजनीतिक दल र स्वतन्त्र गरी १९ जना रहेको छ ।
