विराटनगर । ‘नखेल्नु जुवा र तास, धनको नाश जीवनको बनिबास’ भन्ने गीत जस्तै निरज प्रधान, शंकर भुजेल र अजय खिउँजूको जीवनको बास अहिले कारागारमा छ ।
उनीहरु कारागारमा जानुको एउटै कारण हो अनलाइनबाट जुवाजन्य खेलमा सहभागी हुन प्रयोग गरेको वान एक्सबेट (वानएक्सबिइटी) नामक अनलाइन एप बनेको छ । जुवाजन्य यो खेलकै कारण उनीहरु प्रहरीको खोरमा पुगेका हुन् । वानएक्सबिइटी (ज्ञह्द्यभ्त्० एप एक अनलाइन जुवा कम्पनी हो । जसले विभिन्न खेलहरू, क्यासिनो खेलहरू र अन्य जुवा गतिविधिहरूमा सट्टेबाजीका अवसरहरूको विस्तृत श्रृंखला प्रदान गर्दछ । यो धेरै देशहरूमा महत्वपूर्ण उपस्थितिको साथ एक अन्तर्राष्ट्रिय बुकमेकर हो ।
इटहरीको एभरेष्ट बैंकको शाखा कार्यालयबाट पाँच महिनाको अवधिमा ३३ जना ग्राहकको खाताबाट १ करोड ५० लाख २३ हजार ४३४ रुपैयाँ चोरी भएको खुलासा भएको थियो । अनुसन्धानका क्रममा प्रहरीलाई दिएको बयानमा पक्राउ परेका प्रधान, भुजेल र खिउँजूले फिफा वल्र्डकप २०२२ को क्रममा उक्त खेल खेल्ने गरेको र त्यही क्रममा एक अर्काबीच चिनजान हुँदै रकम लिनेदिने चलेको उल्लेख गरका छन् ।
‘म इटहरी शाखामा कार्यरत रहेको बखत फिफा वल्र्डकप २०२२ भएकै ताका विश्वमा सञ्चालन हुने विभिन्न खेल तथा गतिविधिहरुमा सट्टेबाजी गर्न प्रयोग हुने बेटिङ एप्लिकेशन वानएक्सबेट मार्फत सट्टेबाजी खेल्ने क्रममा मेरो नाउँमा भएको विभिन्न कम्पनीको शेयर बिक्री गरेर खेलें,’ उनले प्रहरीलाई दिएको बयानमा उल्लेख छ, ‘अनलाइनमार्फत सट्टेबाजी खेल्ने क्रममा एजेन्टमार्फत विभिन्न बैंकमा रहेको खातामा पैसा जम्मा गरेपछि मात्र खेल्न पाइने भएकाले आफूसँग रहेको मौज्दात सकिँदै गएपछि मैले एभरेष्ट बैंक, लि.को इटहरी शाखामा कार्यरत रहँदा सोही बैंकमा खाता संचालन रहि मौज्दात रकम भएका ग्राहकहरुको खाताबाट कनेक्ट आइपिएसको दुरुपयोग गरी एजेन्ट शंकर भुजेलले उपलब्ध गराएको विभिन्न व्यक्तिहरूको अन्य बैंकको विभिन्न खातामा रकमान्तर गरेको हुँ ।’
उनले एक्लैले कनेक्ट आइपिएसको दुरुपयोग गरी ग्राहकहरुको खातामा रहेको मौज्दात रकमान्तर गर्न सम्भव नभएपनि आफूले माकर÷चेकर दुईवटा युजर कै पासवर्ड कम्प्युटरमा अटो सेभ गरेर त्यो कार्य गरेको बयान दिएका छन् । उनले आफूलले कति रकम निकाले भन्ने सम्म जानकारी नभएको बयान दिएका छन् । त्यसबेला बैंकका अन्य कर्मचारीले पनि सट्टेबाजी खेल्ने गरेको उल्लेख गरेका छन् ।
यस्तै प्रतिवादी शंकर भुजेलले पनि काठमाडौ कीर्तिपुरमा डेरा गरि बस्ने संजय मोक्तान (लामा)मार्फत अजय खिउँजुसँग चिनजान भएको र कुराकानीका क्रममा १५ कमिसन दिने प्रलोभन दिएपछि लोभमा परि निरज प्रधानसँग वानएक्सबिइटी खेल्ने क्रममै चिनजान गराइदिएको बताएका छन् । ‘ मैले अजय खिउजुसँग पैसा हाल्नको लागि बैंक एकाउन्ट मागेर निरज प्रधानलाई पठाई दिन्थें । निरज प्रधानले सो बैंक एकाउन्टमा अनलाईन मार्फत रकमान्तर गरेको स्क्रिनसर्ट मलाई म्यासेन्जरमा पठाई दिएपछि सो म्यासेज मैले अजय खिउँजुलाई पठाई दिने गरेको थिएँ । सोहि क्रममा निरज प्रधानले मेरो कृषि विकास बैंक, नेपाल इन्भेस्टमेन्ट बैंक, मेघा बैंक र माछापुच्छ्रै बैंकमा आठ लाख पैंतालीस हजार चौबिस रुपैयाँ निकाली घर खर्च गरी खाई मासें,’ उनले भनेका छन् । अजयले म्यासेन्जर मार्फत विभिन्न व्यक्तिको बैंक खाताको क्यूआर कोड पठाउने गरेको र सो म्यासेज निरज प्रधानलाई आफूले सेयर गर्ने गरेको उनले बताएका छन् ।
यस्तै प्रतिवादी अजय खिउँजुले भने अवैध रकम क्यास बनाइदिने प्रलोभनमा पारी खेल्न उक्साउने गरेको बयान दिएका छन् । ‘म करिव १ बर्ष अगाडिदेखि विश्वमा सञ्चालन हुने विभिन्न खेल तथा गतिविधिहरुमा सट्टेबाजी गर्न प्रयोग हुने बेटिङ एप्लिकेशन वानएक्सबिइटी खेल्ने क्रममा जितेको पैसा एजेन्टले मोवाइल क्यास निकालेर चलाई खाईदिएकाले म आफैले वानएक्सबिइटी को वेभसाइट प्रयोग गरी एलिना रिटेल मार्फत वानएक्सबिइटी एपमा रकम जम्मा गरी खेल्न मिल्ने, जित्दा आफैंले क्यास निकाल्न मिल्ने (मोवाइल क्यास) बनाई खेल्दै आएको थिएँ,’ बयानमा खिउँजुले भनेका छन्, ‘शंकर भुजेल र निजैको कोठा नजिक बस्ने संजय मोक्तानले पाटनरसिपमा पहिला देखिनै वानएक्सबिइटी एजेन्ट (मोवाइल क्यास) को काम गर्दै आएका थिए । निजहरुबीच पैसाको बिषयमा आपसी विवाद भएपछि शंकर भुजेलले मलाई भेटि भाई संजयसँग मेरो झगडा भयो, मेरो मोवाइल क्यास बनाई देउ भनेकाले मैले बनाइदिएँ । निजसँग मोवाइल क्यास नभएको बखत मलाई सम्पर्क गर्थे, मैले आफ्नोमा भएको मौज्दात वानएक्सबिइटी खेल्ने व्यक्तिको गेमिङ एकाउन्टमा रकमान्तर गरेवापत एलिना रिटेलबाट ५ प्रतिशत कमिसन पाउँथें ।’
उनले जम्मा सत्र लाख पचासी हजार बत्तिस रुपैयाँ रकमान्तर गर्न लगाएको स्वीकार गरेका छन् । आफूलाई कमिसन वापत आएको पैसा खर्च गरेको उयनले बयानमा उल्लेख गरेका छन् ।
उक्त ठगी प्रकरणका अन्य आरोपीले भने इन्कारी बयान दिएका छन् । उनीहरुले उदयपुर एभरेष्ट बैंकका मेनेजर प्रधान नै यसको मुख्य दोषी रहेको उल्लेख गरका छन् । त्यसबाट आफूहरुले कुनै लाभ नलिएको उनीहरुको जिकिर छ ।
बैंकमा जम्मा गरेको सर्वसाधारणको पैसा ठगी गरेको आरोपमा पक्राउ परेका एभरेष्ट बैंकका प्रबन्धकसहित ९ जना आरोपीको बयान आजदेखि सुरु भएको छ ।
जिल्ला सरकारी वकिलको कार्यालय सुनसरीका अनुसार पक्राउ परेका ९ जना र फरार रहेको ४ जनालाई प्रतिवादी बनाएर उच्च अदालत विराटनगरमा गत शुक्रबार बैंकिङ कसुरमा मुद्दा दर्ता गरेको थियो ।
जसमा ७ जना बैंकका कर्मचारी छन् भने अन्य ६ जना पैसा झिक्ने व्यक्ति रहेका छन् । बैंकका उदयपुरका अपरेशन मेनेजर विराटनगर–८ का ३४ वर्षीय प्रधान, इटहरी शाखा प्रबन्धक तथा सिन्धुपाल्चोक बाह्रविसे–८ का ४२ वर्षीय विश्वराज शाक्य, बैंक इटहरी शाखाका सुपरभाईजर ३७ वर्षीय धावा लामा, बैंकका कनिष्ठ सहायकहरु २७ वर्षीय मनोज घिमिरे, २७ वर्षीय देवराज शर्मा, २७ वर्षकै रंजित पण्डित, बैंकको इटहरी शाखाकी टेलर ३० वर्षीय पवित्रा कटुवाललाई प्रतिवादी बनाएर अभियोग दर्ता भएको छ ।
बैंकको रकम अपचलन गर्ने गिरोहका मुख्य योजना प्रधान रहेको प्रहरी अनुसन्धानबाट खुलेको छ । यस्तै धनुषाको मिथिला नगरपालिका ११ का ३४ वर्षीय शंकर भुजेल, भक्तपुरको सूर्यविनायक नगरपालिका २ का २७ वर्षीय अजय खिउजूलाई पनि प्रतिवादी बनाइएको छ । पक्राउ पर्ने खिउजू र भुजेल पैसा झिक्ने व्यक्ति हुन् ।
फरार प्रतिवादी बनाएर बाँके जिल्ला बैजनाथ गाउँपालिका ८ घर भई काठमाण्डौ, महानगरपालिका ७ का अर्जुन थारु, सप्तरीको सुरुङगा नगरपालिका ६ जय कुमार साह, उर्लाबारी नगरपालिका ३ अशोक थापा र अर्जुन महतरा मुद्दा दायर गरिएको जिल्ला सरकारी वकिलको कार्यालय सुनसरीका जिल्ला न्यायाधीवक्ता एकराज अधिकारीले जानकारी दिए । आजदेखि उच्च अदालत विराटनगरको वाणिज्य इजलाशमा प्रतिवादीको बयान सुरु हुने र त्यसपछि थुनछेक बहस सुरू हुनेछ ।
अनुसन्धानका क्रममा प्रहरीले यसअघि २०७९ चैत १२ गते एभरेष्ट बैंक गाइघाट शाखाका अपरेशन इञ्चार्ज प्रधानलाई पक्राउ गरेको थियो । प्रधानमाथि केरकार गर्दा बैंकभित्रको संगठित जालो पत्ता लागेको सुनसरी प्रहरीको डिएसपी राजकुमार राईले बताए ।
पाँच महिनाको अवधिमा ३३ जना ग्राहकको खाताबाट ५९ पटक कनेक्ट आईपिएस र नक्कली चेकबुक प्रयोग गरेर १ करोड ५० लाख २३ हजार ४३४ रुपैयाँ चोरी भएको अनुसन्धानबाट खुलेको प्रहरीको दाबी छ ।
इटहरी शाखामा कार्यरत प्रधानको गत मार्च १२ तारिकमा गाइघाट सरुवा भएको थियो । उनको योजनामा गत १४ नोभेम्बर २०२२ देखि ३१ मार्च २०२३ सम्म पाँच महिनाको अवधिमा ५९ पटक कनेक्ट आईपीएसबाट एक करोड १४ लाख ७५ हजार २८४ रुपैयाँ निकालिएको छ । त्यस्तै नक्कली चेकमार्फत ३५ लाख ४८ हजार १५० रुपैयाँ निकालिएको प्रहरीले बताएको छ ।
कर्मचारीले ३३ जना ग्रहकको खाताबाट अधिकतम ७ लाखसम्म निकालेको देखिएको प्रहरीले बताएको छ । आफ्नो खाताबाट रकम हराएपछि ग्रहकले बैंकमा जानकारी गराएका थिए । त्यसपछि बैंकले प्रहरीलाई अनुसन्धानका लागि निवेदन दिएको थियो ।
