विराटगनर । विराटनगरबाट प्रकाशित हुँदै आएका चारवटा दैनिक पत्रिकाको प्रकाशन बुधबारदेखि बन्द हुने भएको छ ।
मंगलबार बसेको दैनिक पत्रिका सञ्चालक तथा प्रकाशकहरुको बैठकले पत्रिका बन्द गर्ने निर्णय गरेको हो ।
विश्वभर फैलिरहेको कोरोना भाइरस संक्रमणको जोखिम बढ्दै गएको र त्यसबाट सुरक्षित रहनुपर्ने भएकोले अर्को सूचना प्रकाशित नभएसम्म पत्रिका प्रकाशन नगर्ने निर्णय भएको बैठकपछि जारी विज्ञप्तिमा उल्लेख छ । सरकारले सकेसम्म घरबाहिर ननिस्कन, घरमै बसेर काम गर्न र सुरक्षित रहन आग्रह गरिरहेको छ ।
भाइरस संक्रमण भएको अवस्थामा विभिन्न माध्यमबाट फैलिनसक्ने खतरालाईसमेत मध्यनजर गरेर अवस्था सामान्य नभएसम्म पत्रिका प्रकाशन नगर्ने निर्णय भएको हो । विराटनगरबाट प्रकाशित हुदैआएको उद्घोष दैनिकका प्रवन्ध निर्देशक बन्धु पोखरेल, न्यू सृष्टि दैनिकका अध्यक्ष तथा प्रधान सम्पादक शंकर खरेल, हाम्रोमत दैनिकका प्रवन्धक अर्जुनकुमार आचार्य र दर्शन दैनिकका प्रवन्धक सुभाष काकीबीचको बैठकले पत्रिका प्रकाशन स्थगित गर्ने निर्णय गरेको हो ।
