विराटगनर । विराटनगरस्थित कोशी अस्पताल अन्तर्गतको कोभिड–१९ उपचार केन्द्रमा शनिबार राति एक जना कोरोना संक्रमितको मृत्यु भएको छ ।
झापाको कनकाई नगरपालिका–९ का ४७ वर्षीय पुरुषलाई उपचारको लागि कोभिड अस्पताल ल्याइएकोमा अस्पताल भर्ना नहुँदै राति १०ः४५ बजे मृत्यु भएको हो ।
अस्पतालका व्यवस्थापक ज्ञानबहादुर बस्नेतका अनुसार उनलाई भदौ ८ गते कोरोना पुष्टि भएको थियो । कोरोना देखिएपछि झापाकै मेची अस्पतालमा उपचारका लागि भर्ना गरिएका उनको अवस्था गम्भीर बन्दै गएपछि शनिबार थप उपचारका लागि विराटनगर ल्याइएको थियो ।
संक्रमित पुरुषलाई एम्बुलेन्सबाट झार्दाझार्दै मृत्यु भएको अस्पतालले जनाएको छ । कोभिड अस्पतालको आइसोलेसनमा भर्ना गर्न नपाइ उनको मृत्यु भएको बस्नेतले जानकारी दिनुभयो ।
