काठमाडौं। गुल्मीका कोरोना संक्रमित बिरामीको मृत्यु भएपछि नेपालमा कोरोनाबाट मृत्यु हुनेको संख्या १९ पुगेको छ ।
रेसुङ्गा नगरपालिका –९ स्थित उपल्लो तम्घासमा आइसोलेसनमा उपचाररत धुर्कोट गाउँपालिका ४ जैसिथोक निवासी ३६ वर्षीय पुरुषको शनिबार राति मृत्यु भएको हो ।
स्वास्थ्य गम्भीर हुँदै गएपछि उनको उपचारमा संलग्न स्वास्थ्यकर्मीले नै रगत दिएकी थिइन् । तर, कोसिस गर्दागर्दै पनि उनलाई बचाउन नसकेको प्रमुख जिल्ला अधिकारी भरतकुमार शर्माले जानकारी दिनुभयो । उनको शवलाई राति नै उनकै जन्मस्थान नजिकै नेपाली सेनाले व्यवस्थापन गरेको उहाँको भनाइ छ ।
भारतबाट आएर धुर्कोटको क्वारेन्टिनमा रहेका बेला जेठ १२ गते उनमा कोरोना संक्रमण पुष्टि भएको थियो । संक्रमण पुष्टि भएपछि उनले जेठ १३ गतेदेखि उनलाई तम्घासमा रहेको आसोलेसनमा राखिएको थियो ।
आन्द्राको क्यान्सरबाट पीडित रहेका उनमा रक्तअल्पताको समस्या देखिएपछि उपचारमा खटिएकी स्वास्थ्यकर्मीले रगत दिएकी थिइन् । उनको ३ पटकसम्म गरिएको स्वाब परीक्षणमा पोजिटिभ रिपोर्ट आएको थियो ।
उनीसँगै कोरोना पुष्टि भएका धुर्कोट गाउँपालिकाका अध्यक्ष भुपाल पोखरेल भने निको भएर काममा फर्केका छन् । गुल्मीका मदाने गाउँपालिका एक जनाको यसअघि कोरोनाबाटै मृत्यु भइसकेको छ ।
