पर्यटक पर्खिरहेको ‘पाटेनागी’

इलाम । इलाममा पर्यटकीय सम्भावना बोकेका धेरै ठाउँ छन् । कतिपय ठाउँमा पर्यटक बास बस्ने ठाउँ पाउदैनन् त कतिपय ठाउँले पर्यटक पर्खेर बसेका छन् ।

पर्यटकीय सम्भावनाले भरीपूर्ण इलाम नगरपालिका ३ को पाटेनागी अहिले पर्यटक पर्खेर बसेको छ । सुन्दरताले भरीपूर्ण भएरपनि चर्चामा आउन नसक्दा धेरैले यो ठाउँको महत्व बुझ्न सकेका छैनन् ।

आन्तरिक पर्यटकको आवतजावत बढिरहे पनि बाह्य पर्यटकको आवतजावत भने फाटफुट मात्र रहेको छ । पाटेनागी पुग्ने जो कोहिले फरक गाउँको फरक–फरक परिवेश, खानपान, जीवनशैली बुझ्ने मौका पाउँछन् । होमस्टेमा बस्ने र लोकल कुखुुरा, खसी तथा बोकाको मासुदेखि सेल रोटी, स्थानीय कोदोको ढिडो, आलु, मुला, गाजर, मकै भटमास, केराउलगात स्थानीय उत्पादनबाट बनेका खानाका बिभिन्न परिकारहरुको स्वाद मज्जाले लिन पाईन्छ ।

होमस्टेका नाममा सुविधासम्पन्न होटल पनि निर्माण भइरहेका छन् । तर, ग्रामीण पर्यटनको अवधारणा अनुरूप होमस्टे पर्यटनप्रति आकर्षण बढेको छ । गाउँकै हावापानी, बाटोघाटो, खानपान र गाउँले परिवेशमा रमाउन मौलिक गाउँबस्तीमा पुग्नैपर्छ ।

महंगा होटलको तुलनामा सस्तोमा स्तरीय सेवा होमस्टेमा पाइन्छ । होमस्टेमा बस्ने र चिसो मौसम र स्थानीय परिकारको स्वाद आफ्नै रोजाईमा पाउँन थालेपछि पर्यटकको रोजाई बन्न थालेको हो । पाटेनागी पुग्ने पर्यटकले लेकाली क्षेत्रको वातावरणमा रमाउनुका साथै स्थानीय परिकारको आनन्द लिँदै ट्रेकिङको भरपुर मनोरञ्जन लिन पाउँछन ।

पाटेनागी पुगेपछि लुहाकिम सुकेपोखरीसम्म पनि पुग्न सकिन्छ । इलाम नगरपालिकाको बागखोरबाट १२ किलोमिटरको कच्ची सडकको यात्रापछि त्यहाँ पुगिन्छ । पाटेनागीमा इलाम र देउमाई नगरपालिकाको सिमानामा रहेको कुहिभिर र ठूला ठूला खर्कको अवलोकनसँगै रमाउन सकिन्छ ।

खर्कमा चरनका लागि गएको गाईको ताँतीका साथै मनमोहक दृश्य पनि त्यहाँबाट देख्न सकिन्छ । त्यहाँ पुग्ने जो कोहि पर्यटक त्यहाँको दृश्यको लोभले पुनः फकिएइर आउने गरेका छन् ।

पाटेनागीमा बास बस्नको लागि ठाउँ नभएपनि १२ मिनेटको पैदलबाट तलतिर झरेपछि होमस्टे र गोठमा बास बस्न सकिन्छ ।