विराटनगर । जिल्ला प्रहरी कार्यालय मोरङको हिरासतमा रहेका थुनुवामा कोरोना संक्रमण देखिएको छ ।
जिल्ला प्रहरी कार्यालय मोरङका प्रवक्ता एवं प्रहरी नायव उपरीक्षक मानबहादुर राईका अनुसार जवरजस्ती करणी मुद्दाको अनुसन्धानका क्रममा पक्राउ गरिएका सुनवर्षी नगरपालिका–४ का २६ वर्षीय पुरुषमा कोरोना देखिएको हो ।
कोरोना देखिएपछि ती थुनुवालाई विराटनगरस्थित मारवाडी सेवा सदनको आइसोलेसनमा भर्ना गरिएको छ । मोरङ प्रहरीको हिरासतमा मंगलबार बिहानसम्ममा २६ जना थुनुवा रहेकोमा अरु २५ जनाको रिपोर्ट भने नेगेटिभ आएको छ ।
अनुसन्धानका लागि पक्राउ परेकालाई हिरासतमा राख्नुअघि स्वाब संकलन गरेर पीसीआर परीक्षण गर्ने गरिएको छ । मोरङ प्रहरी प्रमुख एसपी सन्तोष खड्काले बलात्कारको आरोपमा पक्राउ गरेर अनुसन्धान थालिएका थुनुवामा कोरोना देखिएपछि अरु थुनुवालाई संक्रमण नफैलिओस भनेर हिरासतमा सर्तकता अपनाएको बताउनुभयो ।
प्रदेश प्रहरी कार्यालयमा कार्यरत धेरै प्रहरीमा कोरोना देखिएको भएपनि जिल्ला प्रहरी कार्यालयका प्रहरीमा कोरोना देखिएको थिएन ।
