विराटनगर । विराटनगर १ स्थित परोपकारघाटमा हरेक शुक्रबार आयोजना हुँदै आएको साप्ताहिक आरतीले ७१ औं हप्ता पूरा गरेको छ । वैदिक मन्त्रोच्चारण र दीप प्रज्वलनले झिलिमिली हुने यो कार्यक्रम विश्व शान्तिको कामना गर्दै आयोजना गरिँदै आएको छ र यसले स्थानीय समुदायमाझ आध्यात्मिक तथा सामाजिक सद्भावको केन्द्रको रूपमा पहिचान बनाएको छ ।
प्रत्येक शुक्रबार साँझ साढे ५ बजे सुरु हुने आरतीमा पाँच जना आरती गुरुहरूले वैदिक विधिअनुसार मन्त्र उच्चारण गर्दै सामूहिक प्रार्थना गराउँछन् । कार्यक्रममा गुञ्जिने मन्त्र र भजनले उपस्थित भक्तजनमाझ आध्यात्मिक ऊर्जा र उत्साहको सञ्चार गराउने गरेको सहभागीहरू बताउँछन् । दीपमालाको उज्यालो र मन्त्रको ध्वनिले सिङ्घिया खोला किनारमा रहेको यो घाटलाई पवित्र र शान्तमय बनाउँछ ।
कार्यक्रमलाई निरन्तरता दिन प्रमुख संरक्षक शंकर खरेल, विश्वनाथ रिजाल, र संस्थापक अध्यक्ष भिमेन्द्र बहादुर कार्कीको प्रत्यक्ष मार्गदर्शन र सक्रियताले महत्वपूर्ण भूमिका खेलेको छ । यस्ता धार्मिक क्रियाकलापले सामाजिक सद्भाव र सांस्कृतिक चेतना अभिवृद्धि गर्न ठूलो मद्दत पुर्याएको प्रमुख संरक्षक शंकर खरेलले बताए । उनका अनुसार, यो महाआरतीले विराटनगरको धार्मिक तथा सांस्कृतिक पहिचानलाई अझ फराकिलो बनाउन योगदान दिएको छ ।
सुरुवाती दिनहरूमा केही सीमित व्यक्तिहरूको उपस्थितिमा सुरु भएको यो साप्ताहिक कार्यक्रमले अहिले सयौंको संख्यामा स्थानीय बासिन्दालाई आकर्षित गर्न सफल भएको छ । विराटनगर महानगरपालिका–१ मा पर्ने यो घाटमा आरती सुरु भएदेखि नै स्थानीयको उत्साहजनक सहभागिता रहँदै आएको छ । कार्यक्रमले धार्मिक आस्था मात्र नभई सामाजिक एकतालाई पनि बलियो बनाएको छ ।
विराटनगरको परोपकार घाटमा हुने यो सन्ध्याकालीन आरतीले धार्मिक पर्यटन प्रवर्द्धनमा समेत टेवा पुर्याउने अपेक्षा गरिएको छ । कार्यक्रमको आयोजना परमार्थ सिङ्घिया आरती सेवा समितिले गर्दै आएको छ । समितिका पदाधिकारीहरुले यसलाई अझ व्यवस्थित र भव्य बनाउँदै लैजाने योजना रहेको बताएका छन् । आरतीले केवल धार्मिक महत्व मात्र नराखी स्थानीय समुदायलाई एकै ठाउँमा ल्याउने र आपसी भाइचारा बढाउने माध्यमको रूपमा समेत काम गरेको छ । जसले गर्दा यसको महत्व दिनप्रतिदिन बढ्दो छ ।
