विराटनगर । कोशी प्रदेशका मुख्यमन्त्री हिक्मतकुमार कार्कीले पत्रकारित स्वच्छ, मर्यादित एवं सशक्त हुनु पर्ने बताएका छन् ।
नेपाल पत्रकार महासंघ मोरङ शाखाका कार्य समितिका नवनिर्वाचित पदाधिकारीहरुको प्रमाणपत्र वितरण तथा पद हस्तान्तरण समारोहलाई सम्बोधन गर्दै मुख्यमन्त्री कार्कीले पत्रकारहरुको सामुहिक हक, हित र अधिकारको रक्षा गर्ने संस्था नेपाल पत्रकार महासंघको नेतृत्व सर्वसहमतिमा तय हुनु पर्ने धारणा राखेका थिए । उनले सहमति, सहकार्य र एकताबाट असल नेतृत्व छान्ने काम भए खर्च कम हुने समेत उनले बताए ।
मुख्यमन्त्री कार्कीले विकास र समृद्धिको यात्रालाई पूरा गर्न पत्रकारित क्षेत्र सत्य एवं तथ्यमा आधारित हुनु पर्ने भन्दै संविधानको सर्वोच्चता, मानवअधिकार, लोकतन्त्रका निम्ति नेपाली पत्रकारिता क्षेत्र एकजुट भएर लाग्नु पर्ने विचार राखेका थिए ।
मुख्यमन्त्री कार्कीले आगामी हिउँदे अधिवेशनमा सञ्चार प्रतिष्ठान विधेयकसहित थप अन्य विधेयक सदनमा ल्याउने जानकारी दिँदै पत्रकारहरुको वृति विकासका लागि प्रदेश सरकारले लागनी गर्ने समेत बताए ।प्रदेश सरकार आफैले लगानी सम्मेलन गर्ने बताउँदै मुख्यमन्त्री कार्कीले लगानी सम्मेलनबाट कृषि, पर्यटन र उर्जाका क्षेत्रमा ५० औँ अर्ब रुपैयाँ भित्रिने अनुमान रहेको बताए ।
कार्यक्रममा महासंघका कोशी प्रदेशका संस्थापक अध्यक्ष एवं मुख्यमन्त्री कार्कीका प्रेस सल्लाहकार विक्रम लुइँटेल, नेपाल पत्रकार महासंघ कोशी प्रदेशका अध्यक्ष लीलावल्लभ घिमिरे, पत्रकारहरु मोहन भण्डारी, यज्ञ शर्मा लगायतले पनि नवनिर्वाचित पदाधिकारीहरुको कार्यकाल सफलताको शुभकामना दिएका थिए ।
