विराटनगर । मोरङको सुन्दरहरैंचा–७ स्थित गोठगाउँ ठडिया पश्चिम गछिया पूर्वमा रहेको मालती पुल मुनी माओवादी सशस्त्र युद्धको समयमा राखिएका चारवटा सिलिण्डर बम नेपाली सेनाले निस्क्रिय बनाएको छ ।
मालती पुलको मुनी बम रहेको भन्ने सूचनाको आधारमा नेपाली सेनाको बम डिस्पोजल टोलीले खोजी गरेको थियो । नेपाली सेनाको टोलीले गाडिएको अवस्थामा शिलिण्डर बम फेला पारेको थियो । त्यसक्रममा सेनाको बम डिस्पोजल टोलीले बम निस्क्रिय बनाएको मोरङ प्रहरीका प्रवक्ता डिएसपी बेदप्रकाश जोशीले जानकारी दिए ।
बम निस्क्रिय गर्ने क्रममा ठूलो आवाजका साथ विस्फोट भएको थियो । बिहीबार बिहानैदेखि पूर्वपश्चिम एसिएन हाइवेको उक्त खण्डमा आवत जावत बन्द गरिएको थियो । बमको खोजी गर्न र निस्क्रिय गर्न नेपाली सेनाको टोलीलाई बिहान बिहान ८ बजेदेखि बेलुका ५ बजेसम्म लागेको थियो । त्यसक्रममा २ वटा शिलिण्डर विस्फोट भएको र २ वटा सिलिण्डर खाली रहेको भेटिएको प्रहरीले जनाएको छ ।
