बहुमत सिद्ध गर्न नसके मुख्यमन्त्रीले राजीनामा दिनुपर्छ : राई

विराटनगर । कोशी प्रदेश सरकारमा सहभागी दल नेकपा (एकीकृत समाजवादी) कोशी प्रदेशसभा संसदीय दलका नेता राजेन्द्रकुमार राईले विश्वासको मत सिद्ध गर्न नसके मुख्यमन्त्रीले राजीनामा दिनुपर्ने बताएका छन् ।

सरकारमा सहभागी दल सरकारबाट बाहिरिएर समर्थन फिर्ता लिइसकेको अवस्थामा ३० दिनभित्र मुख्यमन्त्री केदार कार्कीले विश्वासको मत लिनुपर्ने निर्देशन दिनेगरी दर्ता भएको संकल्प प्रस्ताबमाथिको छलफलमा बोल्दै राईले अल्पमतको सरकारले निरन्तरता पाउन नसक्ने बताए ।

संविधानको धारा १६८ को उपधारा ५ बाट बनेको सरकार अजम्मरी नहुने भन्दै उनले यो कुरा मुख्यमन्त्रीलाई सरकार बन्नेबित्तिकै आफुले जानकारी दिएको राईले बताए । सरकारमा सहभागी दलले समर्थन फिर्ता लिएपछि ३० दिनभित्र विश्वासको मत लिनैपर्ने उनको भनाई छ ।

तर, सरकार हट्दा पनि कानून सङ्गत र बस्दा पनि कानूनसम्मत रूपमा प्रक्रिया पुर्‍याएर हुनुपर्ने भन्दै राईले मुख्यमन्त्रीलाई आजै राजीनामा देउ भनेर दबाब दिनु अनुचित हुने बताए । मुख्यमन्त्रीलाई ३० दिनभित्र विश्वासको मत लिन कसरत गर्न सुझाव दिदै उनले भने, ‘३० दिनभित्र विश्वासको मत लिन कोसिस गर्नुस्, सक्नुभएन भने मार्ग प्रशस्त गर्नुस् । मुद्दा मामिलातिर नलाग्नुस् ।´

यो सरकारलाई जोगाउने पक्षमा आफू नरहेको भन्दै पुर्बमुख्यमन्त्री राईले केन्द्रमा बनेको गठबन्धन अनुसार नै अगाडि बढ्ने संकेत गरेका छन् ।