विराटनगर । राष्ट्रिय प्रजातन्त्र पार्टीका प्रदेशसभा सदस्यहरू भोलिको कोशी प्रदेश सभा बैठकमा अनुपस्थित हुने भएका छन् । मुख्यमन्त्री उद्धव थापाले विश्वासको मत लिने दिन उनीहरू अनुपस्थित हुने भएका हन् ।
कोशी प्रदेशमा राप्रपाका ६ जना सांसद छन् । उनीहरूलाई बैठकमा अनुपस्थित हुन अध्यक्ष राजेन्द्र लिङदेनले निर्देशन दिएका हुन् ।
पार्टीको निर्देशन आएकै कारण बैठकमा सहभागी नहुने राप्रपाका प्रदेशसभा सदस्य अम्बरबहादुर विष्टले बताए । ‘संघीयताका पक्षधर भन्ने दल एमाले र काँग्रेस मिलेर सरकार बनाउन भन्ने हाम्रो चाहना हो’, उनले भने ‘हाम्रो भावना अनुसार नभएकाले हामी उपस्थित हुँदैनौं, केन्द्रले पनि अनुपस्थित नहुन निर्देशन दिएको छ ।’
राप्रपा संसदीय दलका नेता भक्तिप्रसाद सिटौला भने भारतको दिल्लीमा छन् । प्रदेशसभा बैठक छल्न नै उनी भारत गएको निकटका नेताहरू बताउँछन् ।
यसअघि राष्ट्रिय प्रजातन्त्र पार्टीका अध्यक्ष राजेन्द्र लिङ्देनले विश्वासको मत लिने दिनको टुङ्गो लागेसँगै कोशी प्रदेशमा बहुमत जुटाउन सत्ता गठबन्धन दलका नेताहरूले चलखेल सुरु गरेको र १० करोडको अफर आएको सामाजिक सञ्जालमार्फत सार्वजनिक गरेका थिए । आफ्ना सांसदहरुले थापालाई विश्वासको मत दिने त्रासमा रहेका लिङ्देनले त्यसलाई रोक्न बैठकमै अनुपस्थित हुन निर्देशन दिएका हुन् ।
प्रदेशसभामा एमालेको ४०, काँग्रेसको २९, माओवादी केन्द्रको १३, राप्रपाको ६, नेकपा एकीकृत समाजवादीको ४ र जसपाको १ सांसद गरी ९३ सांसद छन् । मुख्यमन्त्रीलाई विश्वासको मत पाउन गठबन्धनसँग बहुमत सांसद (४७) छन् । तर, उपभामुखले बैठक सञ्चालन नगरेको अवस्थामा र राप्रपा पनि बैठकमा अनुपस्थित हुँदा सत्तारुढ गठबन्धनलाई बहुमत जुटाउन समस्या हुनेछ ।
विश्वासको मत लिने समयमा प्रदेशसभाको सभाध्यक्ष सत्ता गठबन्धनले गर्नुपर्ने परिस्थिति निर्माण भएको अवस्थामा बहुमत पुग्दैन । यस्तो परिस्थिति निर्माण गर्न उपसभामुखलाई एमालेले राजीनामा गराउने संभावना रहेको छ ।
उपसभामुखको राजीनामकाको संभावना रहेकै कारण प्रदेशसभामा रहेका एमालेका जेष्ठ सदस्यहरुले बैठकमा अनुपस्थित हुने सूचना प्रदेशसभा सचिवालयलाई दिइसकेका छन् ।
