उन्मादी युवा !

  डा.बालकृष्ण साह

बुधबार विराटनगरको दुधफारम नजिकै साइकल चालकलाई विपरीत दिशाबाट आएको एउटा कारबाट ओर्लेर एक युवकले बडो कडा मुक्का प्रहार गरेर साईकल चालकलाई बङ्गलङ्ग ढालेको र अचेत युवालाई सडकमा घिसारेर साइड लगाएको दृश्य भाइरल छ ।

रातिको समय अनि सुनसान सडक । यस अवस्थमा बेस्करी गाडी हुँइक्याउने मन कसलाई नहोला ? त्यसमा पनि भर्खरका युवा अनि मदिरापान । संसार जित्ने जोसको वेलामा विपरीत दिशाबाट साइकलले लेन काटेर आएको देखेपछि रिस उठ्नु स्वाभाविकै होला । तर रिस उठेपछि अरुको ज्यानै मार्ने ? अचेत भएर लडेपछि मानवीय सेवा गर्नुको सट्टा सडकमा कसरी घिसार्न सके ? यसले हाम्रो संस्कार कता जाँदैछ र युवा पिंढीमा मानवता कति हराइसकेको रहेछ त ?

सम्पत्ति कमाउने होडमा र सफलता चुम्ने दौडमा घर–परिवार, नैतिकता र अनुशासन बिर्सने धेरै छन् । मेहनतका कारण सफलता मिलेका पनि देखिन्छ । तर सफल ती अभिभावकहरुको अथाह सम्पत्तिले नाबालक अवस्थामा नै सन्तानहरु धुम्रपान÷मद्यपान कुलतमा फसेका उदाहरणहरु हाम्रो समाजमा धेरै छन् । साथीहरुसँग जमघट, अत्यधिक रक्सी सेवनलाई त अपराध मानिदैन । यसका लागि उमेर चाहिँदैन । २० वर्षको उमेर नपुग्दै गाडी किनिदिने, घरमा रक्सी सेवन गरेर ढिला आए पनि छुट दिने परिपाटि बढ्दै गएको छ ।

जिम्मेवार सन्तानले अभिभावकको मेहनतलाई आत्मसाथ गरेर अगाडि बढेका पनि धेरै उदाहरणहरु यहि समाजमा छन् । तर यिनै स्वतन्त्रताले सडक दुर्घटना तथा अपराधिक घटनाहरु पनि हुने गरेका छन् । पछिल्लो समयमा सम्पत्ति र राजनीतिक शक्तिले मात लागेका युवाहरु सकारात्मक परिवर्तन भन्दा पनि अरुलाई मान्छे नदेख्ने, धाकधम्की दिने स्वभावका देखिन थालेका छन् । यस्ता युवाहरुमा श्रमजीवि, मेहनती विशेषगरी कम आय भएका निम्नवर्गका, त्यसमा पनि मधेशीमूलका व्यक्तिहरुमा शोषण गर्ने, धाक देखाउने प्रवृत्ति बढेको पाइन्छ । यस्ता गैर मानवीय व्यवहार पछिल्लो समयमा संस्कार बन्दै गएको छ ।

‘यत्रोबाटो हुँदाहँुदै हाम्रो लेनमा आउनुपर्ने, यसको यत्रो हिम्मत !’ सायद यहि कुरा मनमा खेलेको हुनुपर्छ । यसलाई मारे नि केही हुँदैन, केहि परे बाउले बचाइहाल्छ नि । यस्तै–यस्तै भएको हुनुपर्छ । १८–१९ वर्षको ठिटोलाई रातिराति मदिरा सेवन गरेर गाडी कुदाउने वातावरण कसरी बन्यो ? भाइरल भएको सो मुक्का प्रहार हेरेर सबैको आङसिरिङ्ग भए होला । कस्तो अपराधी रहेछन् भन्ने सबै होला । तर, पनि उनको वकालत गरिदिने र उसलाई माफ हुनुपर्छ भन्ने रहेसम्म समाजमा अनुशासन कसरी कायम हुन्छ ? यो लडाइँ पवन साहको होइन । यो एउटा जात र वर्गको मात्र पनि होइन । उनलाई हुने कारबाहीले स्वतन्त्रताले ल्याएको यो गैर मानवीय अपराध माथिको नियन्त्रण पनि हुनेछ । अनुशासन र मानवीय संस्कारको सम्मान पनि हुनेछ ।

यसका विरुद्धमा समयमा नै राज्य सत्ताबाट न्याय नपाए, फेरि समाजिक क्रान्ति नहोला भन्न सकिन्न । यसरी मिडियाहरुले यस समाचारलाई स्थान दिंदै समाजिक रुपमा अगाडि बढाएका छन् र प्रहरी–प्रशासनले कारबाही अगाडि बढाएको छ । त्यसरी नै पछि कारबाही होस् र समाजिक सद्भाव कायम रहोस् । पैसा र पावरले समाजिक अन्याय नहोस् ।