विराटनगर । नेपाली काँग्रेसका नेता डाक्टर शेखर कोइरालाले नक्कली भुटानी शरणार्थी प्रकरणमा जोडिएका जो कोही कारबाहीको दायरामा आउने बताएका छन् ।
विराटनगर विमानस्थलमा सञ्चारकर्मीसँग कुरा गर्दै उनले नक्कली शरणार्थीको विषय राष्ट्रियस्तरमा मात्रै नभएर अन्तराष्ट्रिय हिसावले पनि जोडिएको भएको कारण अनुसन्धान प्रभावित पार्ने कुनै सम्भावना नरहेको दाबी पनि गरे ।
‘यो त नक्कली शरणार्थीको इस्यु देशको लागि पनि लज्जास्पद कुरा हो । प्रहरी प्रशासनले अनुसन्धान गरिरहेको छ । त्यो रोकिन्छ जस्तो मलाई लाग्दैन । किनभने यो राजनीतिक वृद्धमा राष्ट्रिय रुपमा आइसक्यो र यो अन्तराष्ट्रिय स्तरमा पनि गइसकेको छ । शरणार्थीलाई अमेरिका पठाउने भनिसकेपछि उनीहरु पनि सशंकित हुन्छन् नि यो केभइरहेको छ नेपालमा भनेर । त्यसकारण यो रोकिन्छ भन्ने मलाई चाहिं विश्वास लाग्दैन ।’
आजसम्म प्रहरीले अनुसन्धान गरिरहेको छ भने गरेको भन्नु पर्ने उनले बताए । ‘जो–जो दोषि हो उनीहरु त कारबाहीमा पर्नुपर्छ । गतल काम भएको छ । उनीहरुले कारबाहीको भागिदार बन्नुपर्छ,’ उनले भने, ‘तीन जना नेताले छलफल गरे, दुई जना नेताले बसेर छलफल गरेको विषयमा आएका समाचार हामीले पनि पढेका छौं । उहाँहरुले जे सुकै कुरा गरेपनि यो नक्कली शरणार्थीको विषय अन्तराष्ट्रियकरण भइसकेको छ । त्यसकारण त्यति सजिलो गरि प्रहरी प्रशासन पनि ब्याक हुन सक्दैन ।’
अर्को प्रसंगमा नेता कोइरालाले महामन्त्री गगन थापाले असन्तुष्टि पोखेको विषय सभापतिप्रति लक्षित हुनसक्ने बताए । अहिले मन्त्री बनेकाहरु काँग्रेसबाटै बनेको भन्दै यसमा सबैसँग सल्लाह गरेरै भएको कोइरालाले बताए । ‘सबैसँग सल्लाह गरेरै मन्त्री बनेका हुन् । मन्त्री बन्नेहरु काँग्रेस नै हुन् । महामन्त्रीहरुले राखेको असन्तुष्टिको विषय उहाँसँगै सोध्नुहोला,’ कोइरालाले भने, ‘म सँग गगनको कुनै पनि तिक्तता छैन ।’
