विराटनगर । सरकार र विप्लव समूहबीचको वार्तामा तीन बुँदे सहमति भएको खबरलाई धेरैले ‘ठूलो उपलब्धि’ का रुपमा प्रचार गरिरहेका छन् । तर, मोरङ मिक्लाजुङ २ की धनकुमारी श्रेष्ठलाई यो खबरले पटक्कै छोएको छैन । लगभग भावहीन मुद्रामा टोलाइरहेकी उनी सोधिरहनुभएको छ ‘अब मेरो श्रीमान फिर्ता आउनुहुन्छ ?’
बिहीबार ८८ दिन पूरा भयो, धनकुमारीका शिक्षक पति राजेन्द्र श्रेष्ठको हत्या भएको । यी दिनहरु उहाँको र परिवारका लागि पीडादायी र शुन्य जस्तै छन् । घरमा सबैथोक छ, अभिभावक राजेन्द्रबाहेक ।
परिवारका सदस्यहरु अझै पनि पीडाबाट बाहिर आउन सकेका छैनन् । निर्दोष राजेन्द्रको ज्यान विप्लव समूहले लिएको थियो, जसका सर्वोच्च नेतालाई प्रधानमन्त्री केपी ओलीले काठमाडौंमा स्वागत गर्दै महान् काम गरेको बताउनुभयो । ‘न प्रधामन्त्रीले राजेन्द्रहरुको हत्याबारे केहि बोलेको सुनियो, न विप्लबले गल्ती महशुस गरेको’ पीडित परिवारको गुनासो छ ।
‘उहाँले के बिगार गर्नुभएको थियो र मारेको ?’, धनकुमारीले सोधिरहनुहुन्छ । उहाँका आँशु अझै थामिन सकेका छैनन् । ५३ वर्षीया धनकुमारी भक्कानिंदै भन्निुहुन्छ ‘चित्त बुझाउने कुनै उपाय भेटेको छैन ।’ मंसिर २३ गतेको घटना सम्झेपछि उहाँलाई भाउन्न हुन्छ । आफूले टेकेको धर्ती धस्सिएजस्तो हुन्छ । कानमा पतिका आवाज गुञ्जिन छाडेका छैनन् ।
विप्लव नेतृत्वको नेकपा कार्यकताले शिक्षक श्रेष्ठको घाँटी रेटेर बर्बरतापूर्वक हत्या गरेको ३ महिना हुँदा विप्लबले शान्ति प्रक्रियामा आउने सहमति सरकारसँग गरेका छन् । अघोषित सशस्त्र गतिबिधि गरिरहेको विप्लबसँगको सहमतिमा सो समूहसँग रहेको हतियारबारे कुनै उल्लेख नहुँदा धेरैलाई झस्काएको छ ।
विप्लब समूहका कार्यकर्ताहरुमाथि राज्यले लगाएको मुद्दा फिर्ता गर्ने, जेलमा रहेका कार्यकर्ताहरु रिहाइ गर्ने, सो समूहमाथि लगाइएको प्रतिबन्ध हटाउने र विप्लब समूहले शान्तिपूर्ण राजनीतिक गतिविधि सञ्चालन गर्ने सहमति सार्वजनिक भएको छ । सहमतिपत्र सार्वजनिक कार्यक्रममा न प्रधानमन्त्री र न विप्लब कसैले पनि राजेन्द्र जस्ता निर्दोश व्यक्तिहरु सम्झिएनन् । विप्लब समूह प्रतिबन्धित भएपछि देशभर ११ जनाको ज्यान गएको प्रहरीको तथ्यांक छ ।
सहमतिसँगै बिनाकारण हत्या गरिएका मिक्लाजुङको सरस्वती आधरभूत विद्यालयका प्रधानध्यापक श्रेष्ठको परिवारले न्याय पाउनेमा संशय पैदा भएको जनाएको छ । श्रेष्ठलाई गत २३ मंसिरमा बिहानै हतियारधारी समूहले अपहरण गरी नजिकैको जङ्गलमा लगेर घाँटी रेटेर हत्या गरेको थियो । हत्याको जिम्मेवारी विप्लव समूहले लिएको थियो ।
घटनामा संलग्न भएको आरोपमा विप्लव समूहका डिबी सिलवाल भनिने धनबहादुर विश्वकर्मा प्रहरीको लामो मिहेनतपछि पक्राउ परेका छन् । उनीसहित ३५ जनाविरुद्ध सरकारी वकिलको कार्यालयले मोरङ अदालतमा अपहरण तथा कर्तव्य ज्यान मुद्दा चलाएको छ । बिक अहिले पुर्पक्षको लागि थुनामा छन् । विप्लव समूहका महासचिव नेत्रविक्रम चन्द ‘विप्लव’, खड्गबहादुर बिश्वकर्मा ‘प्रकाण्ड’ लगायतलाई पनि मुद्दामा प्रतिवादी बनाइएको छ ।
श्रीमानसँग मिक्लाजुङ १ बर्खेमा बस्दै आएकी धनकुमारी श्रीमानको हत्या भएपछि अहिले छोरा, बुहारी र नातीहरुसँग मिक्लाजुङ्ग २ रचनागाउँमा बस्दै आउनुभएको छ । ‘श्रीमानको हत्याको घटनामा एक जनालाई प्रहरीले पक्राउ गरेको भनेको सुनेको थिएँ,’ उहाँले भन्नुभयो, ‘हत्या आरोपीहरुसँगै वार्ता गरेर समझदारी बनाएपछि न्याय नपाउने चिन्ताले सताएको छ ।’
व्यक्ति हत्या भएकोले दोषीलाई कडा कारवाही हुनुपर्ने धनकुमारीले बताउनुभयो । ‘दोषीलाई कारवाही भए मात्र मेरो श्रीमानको आत्माले शान्ति पाउँछ,’ उहाँले भन्नुभयो, ‘न्यायको लडाइँको लागि अन्तिमसम्म लागिपर्नेछु ।’ अहिले झट्ट कसैले घटनाबारे सोधिहालेमा पनि उहाँ झस्किनुहुन्छ । धेरै पटक उनले त्यो क्षण भुल्न खोजिन् । ‘जति जति भुल्न खोजें, उति पिरोलिरह्यो’, धनकुमारी सुनाउँछिन् ।
श्रीमान गुमाएपछि छोरा छत्रबहादुर र बुहारी अनुसँग बस्दै आउनुभएको छ । ‘श्रीमानको कमाइले आडभरोसा थियो । आम्दानीको स्रोत नभएपछि अहिले १४ वटा बाख्रा पालन सुरू गरेको छु,’ उहाँले भन्नुभयो, ‘राज्यले पनि अहिलसम्म कुनै सहयोग गरेको छैन ।’
