विराटनगर । जागिरको खोजीमा रहेकी किशोरीले एउटा अखबारमा रोजगारीको अवसर भन्ने सूचना देखिन् । खोटाङबाट आएकी उनलाई सहरमा टिक्न र पढ्न जागिर जरुरी थियो । सूचनामा आकर्षक तलबको प्रस्ताव गरिएको थियो र समयमै आवेदन पनि दिइन् ।
केही दिनपछि अन्तरवार्ता भयो । जागिर पनि मिल्यो । मासिक पारिश्रमिक ३० हजार पाउने सहमति भएपछि उनमा खुसिको सिमा रहेन । काम गर्न थालिन् ।
खोटाङ्ग जन्तेढुँगा गाउँपालिकाबाट सहर आएकी किशोरीले रोजगारदाता कम्पनीको सेल्स एण्ड मार्केटिङ्ग प्रतिनिधिको रुपमा काम थालिन् । काम सजिलै थियो । बैंकहरुमा जाने, चेक साट्ने र रकम ल्याउने काम गर्नुपथ्र्यो । त्यसअघि किशोरीलाई तीन दिनको आधारभूत तालिम दिइएको थियो ।
काम गर्दै जाँदा मात्र आफू अनलाइन मार्केटिङ कम्पनीमा कम गरिरहेको उनलाई जानकारी भयो । त्यस विषयमा उनलाई अरु कुरा केही थाहा थिएन । धेरै बुझ्नुपर्ने आवश्यकता पनि थिएन । आखिर अह्राएको काम गर्ने कर्मचारीको मात्र भूमिका थियो ।
जागिर चलिरहेकै थियो । सुरु महिनाको तलब पनि समयमै भुक्तानी भयो । तर, जागिर सुरु भएको तीन महिना पुग्दानपुग्दै उनलाई प्रहरीले पक्राउ ग¥यो । आफूलाई किन पक्राउ गरिएको हो भन्ने कुनै भेउ नपाउँदै उनले प्रहरी कार्यालयमा पुगेपछि मात्र नेटवर्किङ मार्केटिङको नाममा ठगीधन्दा चलाउनेहरुको चङ्गुलमा परेको जानकारी पाइन् । त्यतिबेला मात्र उनलाई याद भयो कि तालिम लगत्तैको केही दिनपछि आफू कसरी ठगहरुको चङ्गुलमा फसेको रहेछु भन्ने ।
जागिर भर्खर सुरु भएको थियो । तालिम सकेर केही दिन काम गरेपछि इटहरीबाट विराटनगर सरुवा गरेर ल्याइएको थियो । कम्पनी सञ्चालक सुन्दरहरैंचा ३ का विशाल अर्यालको नामले चिनिने रञ्जनप्रसाद आचार्यले केही दिन खाना पकाउने काममा लगाए । त्यही सिलसिलामाा आचार्यले आफ्नी श्रीमतीसँग पनि परिचय गराएपछि दुवैबीच गफगाफ हुनथाल्यो । त्यहि क्रममा आचार्यकी श्रीमतिले नाङ्गो फोटो पठाउन आग्रह गरेकोमा किशोरीले अस्वीकार गर्दा किशोरीको विश्वासका लागि उनले आफ्नो निर्वस्त्र तस्बिर म्यासेन्जरमा पठाइन् । तस्बिर नपठाए जागिर दिगो हुननसक्ने भन्दै मनोवैज्ञानिक दवाव आएपछि किशोरीले कसैलाई चुहावट नगर्ने सर्तमा आफ्नो निर्वस्त्र तस्बिर पठाइदिइन् । तस्बिर पठाएपछि आचार्यले अनलाईन मार्केटिङको विभिन्न काममा लगाउने र नगरे तस्बिर सार्वजनिक गरिदिने धम्की दिनथाले ।
धम्कीसहित आचार्यको समूहले उनलाई ठगी गरेको रकम बैंकबाट निकाल्ने काममा प्रयोग गर्न थालेको थियो । ५० हजार रुपैयाँसम्मको रकम उनलाई निकाल्न लगाउने गिरोहले त्यसभन्दा बढि रकम भने गिरोहको नाइके आचार्यले नै निकाल्ने गरेका थिए ।
त्यसैबीचमा गत मंसिर १५ गते अनलाइन मार्केटिङको नाममा ठगी गरेको आरोपमा आचार्यसहित ८ जना पक्राउ परे । मोरङ प्रहरीले उनीहरु विरुद्ध मोरङ जिल्ला अदालतमा मुद्दा दर्ता ग¥यो । उनीहरु विरुद्ध ‘अपराधिक समूह स्थापना, संचालन गरी ठगी, बैकिङ्ग कसुर र सरकारी दस्तखत किर्ते’ गरेको अभियोगमा मुद्दा दर्ता भयो । मुद्दा किशोरीलाई पनि लाग्यो । जागिरको खोजी गर्दै गर्दा अखबारमा आएको विज्ञापनका आधारमा जागिर थालेकी उनी अनाहकमा कसुरदार बनिन् ।
अनलाइन सपिङ्गको नाममा ठगी आरोपमा पक्राउ परेका गिरोहका मुख्यनाइके ३६ वर्षीय आचार्यसहित ९ जना विरूद्ध अदालतमा मुद्दा दर्ता गरेपछि बयान सुरू भएको छ । एक जना प्रतिवादी अझै फरार छन् । जिल्ला अदालत मोरङको १ नम्बर इजालशमा गत बिहीबारदेखि अभियुक्तहरूको बयान सुरू भएको हो । बयान आइतबारसम्म चलेको श्रेस्तेदार इश्वरमणि ओझाले बताउनुभयो । बयान सकिएपछि प्रतिवादी विरुद्ध थुनछेकको बहस सुरु हुनेछ ।
गत बिहीबार मोरङ प्रहरीले सरकारी वकिलको कार्यालयमार्फत प्रतिवादीहरु आचार्य, खोटाङ जन्तेढुंगा गाउँपालिका –४ का २२ वर्षीय शिवजी खड्का र फरार अभियुक्त इटहरी ४ की ३० वर्षीया मधुकुमारी आचार्यलाई फरार प्रतिवादी बनाएर मुद्दा चलाएको छ । पक्राउ परेका विशाल भनिने निराञ्जनप्रसाद आचार्य ठगी धन्दाका मुख्य नाइके भएको प्रहरीको अनुसन्धानबाट खुलेको थियो ।
आचार्यले यही धन्दामा अन्य ७ जनालाई परिचालन गरेको खुलेको छ । पक्राउ परेका युवतीलाई आचार्यले बैंक खाता खोल्नका लागि नागरिकता दिएर ठगी धन्दामा सहयोग अभियोग पत्रमा उल्लेख छ । आचार्यको ठगी गर्ने सञ्जाल भारतमा पनि रहेको प्रहरी अनुसन्धानबाट खुलेको छ । भारतमा बसेर उनको सम्पर्कमा रहँदै नेपालमा गिरोह सञ्चालन गर्नेमा मिश्रा राजुभाइ, राजाराम त्रिपाठी, राजेश विश्वास, जहेब हुसेन, कुनाल थमन, नमु श्रीकान्त, कंकिता थमन रनदप्रसाद साहलगायतका व्यक्ति रहेको अभियोग पत्रमा उल्लेख छ ।
आचार्यले विभिन्न बैंकमार्फत ९० लाख रुपैयाँभन्दा बढी ठगी गरेर भारत पठाएको दावी गर्दै अभियोग पत्र दर्ता गरिएको छ । ठगी गर्ने क्रममा २५ भन्दा बढी भारतीय र नेपाली बैंकलाई प्रयोग गरेको पनि देखिएको छ । आचार्यका ७८ वटा नेपाली र १७ वटा भारतीय बैंकमा खाता रहेको अनुसन्धानका क्रममा फेला परेको छ ।
आचार्यले विभिन्न १७ जना व्यक्तिको नाममा खाता खोलेर चेकमाथि नियन्त्रण गरी प्रयोग गर्दै आएको प्रहरी अनुसन्धानबाट खुलेको छ ।
