सम्पादकीय
जब स्थानीय सरकार जनप्रतिनिधिहरुकै अहम्कै लागि अनिर्णयको बन्दी हुन्छ, त्यसबेला उक्त स्थानीय तहका नागरिकले दुःख पाउने निश्चित हुन्छ । आगामी आर्थिक वर्षको नीति कार्यक्रम तथा बजेटको तयारीमा लाग्नुपर्ने संवेदनशील समयमा धरान उपमहानगर फेरि एकपटक आन्तरिक किचलोले चर्चामा छ । यो किचलोको केन्द्रमा धरानका मेयर हर्क साम्पाङ र वडाध्यक्षहरु छन् ।मेयर र वडाध्यक्षहरुलाई समन्वयको प्रयास गरिरहेका उपमेयर अइन्द्रविक्रम बेघाले पनि अन्ततः लामो मौनता तोड्दै ‘मेयरले सबैलाई मिलाएर लैजानु पर्ने’ भन्दै मेयरको कार्यशैलीप्रति सार्वजनिक रुपमै असन्तोष प्रकट गरेका छन् । यसप्रति मेयर साम्पाङ रुष्ट बनेर सामाजिक सन्जालमा रोष प्रकट गरिरहेका छन् । यसले धरानका अरु सबै जनप्रतिनिधिहरु एकातिर अनि मेयर एक्लै अर्कोतिर हुने अवस्था सिर्जना भएको छ । यसले धरानमा झनै अन्योलको अवस्था निम्त्याएको छ । यो विवाद तत्काल अन्त्य गरेर अघि बढ्न मुख्यतः मेयर साम्पाङले अग्रसरता देखाउन आवश्यक छ ।
धरानमा पछिल्लो दुई महिनायता कार्यपालिका बैठक हुन सकेको छैन । मेयरको स्वकिय सचिवालयले वडाध्यक्षहरुलाई निर्देशनात्मक पत्राचार गरेपछि सुरु भएको विवाद बढेको बढ्यै छ । अहिले त सडकमै भिडन्त हुने अवस्था बनेको छ । यो मूलतः आफूबाहेक सबै बेठिक भन्ने रुढ मान्यताबाट चलेका मेयरको शैलीको परिणाम हो । खानेपानीका लागि चलाइरहेको अभियानको बलमा आर्जित लोकप्रियतालाई आफ्नो आलोचना छल्ने अस्त्र बनाउने काममा मेयर अग्रसर देखिन्छन् । आफू ठीक अरु सबै बेठिक भन्ने ग्रन्थीबाट प्रेरित मेयरले अरुलाई अपमान गर्ने, सामाजिक सन्जालमार्फत लान्छना लगाउने काम गरिरहेका छन् । मेयरका रुपमा मुख्य प्राथमिकता भुलेर धरानका साम्पाङले सामाजिक सन्जालबाट एकअर्कालाई भिडाउन उक्साइरहेका छन् । यो आपत्तिजनक हर्कत तत्काल बन्द गरेर उनले सबैलाई समेटेर अघि बढ्ने कौशल प्रदर्शन गर्नुपर्छ ।
मेयर साम्पाङ कहिले राजनीतिक दलहरुसँग जोरी खोज्छन्, कहिले छिमेकी पालिकाहरुसित सीमा विवाद उछाल्न पुग्छन् । कहिले पत्रकार र पत्रकारिता क्षेत्रप्रति विषवमन गर्छन् । नगर प्रमुखको दायित्वबोध नगरी अझै पनि उरन्ठ्यौलो शैली अंगाल्ने छुट उनलाई छैन । आफ्ना आलोचकप्रति समर्थक लगाएर धम्क्याउन लगाउने गरेको गम्भीर आरोप उनीमाथि छ । यदि यो आरोप सत्य सावित भयो भने त्यसले उनलाई हानी गर्नेछ । सामाजिक सन्जालको वाहवाहीले भन्दा आफ्नो पालिकामा खरो उत्रने प्रयासले मेयरलाई सफल तुल्याउनेछ ।
मेयरका समर्थकहरु यति अराजक र अनियन्त्रित बनेका छन् कि धरानमा कसैले जायज माग उठाउँदा पनि मेयरको लोकप्रियताका अघि आक्रमणमा परिने भय छ । मेयरको ‘लोकप्रियता’ले धरानमा अभिव्यक्ति स्वतन्त्रता नै हरणमा परेको अवस्था छ । यो डरलाग्दो अवस्था हो । मेयरमा एक्लै निर्णय गर्ने बानी देखिएको छ र त्यसले कुनै पनि निर्णय परिपूर्ण नहुने र काँचा पल्टिने जोखिम उच्च छ । त्यसैले म सही अरु सब गलत भन्ने मान्यताबाट मुक्त भएर मेयरले सबैलाई मिलाएर अघि बढ्ने क्षमता देखाउनै पर्छ । अन्यथा अहिलेसम्म उनले आर्जेको लोकप्रियता पानीको फोका सरह बिलाएर जाने निश्चित छ । वडाध्यक्षहरुले पनि अह्म त्यागेर नगरको हितलाई सर्वोपरी महतव दिनुपर्ने खाँचो उत्तिकै छ ।
