विराटनगर । १२ औँ संस्करणको प्याब्सन स्पोर्ट्स मिट आज दिउँसो ११ बजेबाट सुरु हुदैछ । प्रदेश १ का मुख्यमन्त्री हिकमत कार्कीले प्याब्सन स्पोर्ट्स मिटको उद्घाटन गरेपछि औपचारिक रूपमा सुरु हुनेछ ।
प्याब्सन मोरङको आयोजनामा भएको स्पोर्ट्स मिटमा एक दर्जन खेलहरू समावेश रहेको छ । प्याब्सन स्पोर्ट्स मिट अन्तर्गत फुटबल खेल बिहीबारदेखि सुरु भएको छ । विराटनगरको जुट मिलको खेलमैदानमा भएको फुटबलमा पाँच वटा विद्यालय विजयी भई दोस्रो चरणमा प्रवेश गरेको छ ।
प्रतियोगिता अन्तर्गत पहिलो खेलमा हरैचा मोर्डल विजयी भएको छ । सुन्दरहरैचा नगरपालिकास्थित ब्राइट फियुचर स्कुललाई ५–० गोल हराउँदै हरैचा मोर्डल विजयी भएको हो । जितको लागि हरैचा मोर्डलका कृष्ण कार्की दुई गोल, सुप्रिम विष्टले २ गोल र नारायण सुवेदी १ गोल गरेका थिए ।
सोही दिन भएको दोस्रो खेलमा उर्लाबारीको मोरङ जोर्डन स्कुल विजयी भएको छ । सुन्दरहरैचाको राइजिङ्ग सुन्दरहरैचा स्कुललाई ट्राई बेकरमा ४–३ गोलले हराउँदै मोरङ जोर्डन स्कुल विजयी भएको हो ।
तेस्रो खेलमा शिक्षा सदन स्कुल विजयी भयो । शिक्षा सन्देश बेलबारीले सगरमाथा बेलबारीलाई ४–० हरायो । जितको लागि शिक्षा सन्देशका आशेष मगरले एक्लै चार गोल गरेका थिए ।
चौथो खेलमा पथरीको बालमिकी स्कुल विजयी भयो । माउन्ट मकालु स्कुल नआएपछि वाक ओभर पाएर पथरीको बालमिकी स्कुल विजयी भयो ।
पाँचौँ खेलमा रंगेलीको मिनीबेन्ड स्कुल विजयी भयो । विराटनगरको बिकेभिए स्कुल नआएपछि मिनीबेन्ड स्कुलले वाक ओभरमा विजयी भएको हो ।
आज शुक्रवार चार खेल हुनेछ ।
