विराटनगर । मधुमेह भएका व्यक्तिले समयमै आँखा परिक्षण गराइ दृष्टिविहीन हुनबाट बचाउनुपर्ने विराटनगरमा आयोजित एक कार्यक्रममा चिकित्सकहरुले बताएका छन् ।
गोल्छा आँखा अस्पतालले विराटनगरमा विश्व मधुमेह दिवसको अवसर पारेर मधुमेहले आँखामा पार्ने असर (डाइबेटिक रेटिनोपेथी) बारे सञ्चारकर्मीसँग अन्तरक्रिया कार्यक्रममा उनीहरुले यस्तो बताएका हुन् ।
कार्यक्रममा गोल्छा आँखा अस्पतालका नेत्ररोग विशेषज्ञ तथा अस्पतालका चिप मेडिकल डाइरेक्टर डा.सुवास पोखरेलले मधुमेहकै कारण आँखामा पनि समस्या देखिने विरामी अस्पताल आउने क्रम बढेको बताए । अस्पतालमा दैनिक ३ सय देखि ३ सय ५० जना आँखाका विरामी आउनेमध्ये मधुमेहको कारण आँखामा समस्या आउने विरामी २८ प्रतिशत रहेको उको भनाइ छ । मधुमेहकै कारण आँखाको दृष्टि कमजोर हुँदै जाने उनले बताए ।
डा.पोखरेलका अनुसार कपितय बिरामीहरु मधुमेहको पहिचान पछि आँखा परीक्षणका लागि आउने गरेका छन् । कतिपय बिरामीहरु आँखामा समस्या भएपछि मात्रै उपचारका लागि आँखा अस्पतालमा आउने गरेका छन् । ‘अझै पनि मधुमेहका बिरामीमा आँखा जाँच गराइराख्नुपर्छ भन्ने जानकारी छैन, मधुमेह जाँच गराउने चिकित्सक तथा स्वास्थ्यकर्मीले आँखाको जाँच गराउनुपर्छ भन्ने जानकारी दिनुपर्छ,’ उनले भने, ‘आँखा पनि जचाउनुर्छ भन्ने जानकारी नहुँदा आँखामा समस्या देखिएपछि मात्र उपचारका लागि आउने बिरामीहरु पनि छन् ।’
अन्तराष्ट्रिय मधुमेह संघका अनुसार विश्वमा ५३७ मिलियन मानिस मधुमेहबाट ग्रसित छन् । मधुमेहकै कारण मानिसहरुमा अन्धोपना, खुट्टा काट्नुपर्ने अवस्था, हृदय रोग, मिर्गौलाले काम नगर्ने अवस्था र मृत्युसमेत हुने गरेको छ ।आँखामा देखिने समस्याहरुमध्ये डायबटिक रेटिनेपेथी दृष्टिविहिन गराउने कारणहरुमध्ये एक प्रमुख कारण हो । मधुमेह भएको २० वर्षमा पहिलो प्रकारको करिब सबै र दोस्रो प्रकारको मधुमेहमा करिब दुईतिहाई बिरामीको आखाँको पर्दा अर्थात रेटिनामा असर परिसकेको हुन्छ ।
मधुमेहले आँखाको पर्दाको कोशिकाहरुमा असर गरि पर्दाको रक्तसञ्चारमा प्रभाव पार्दछ । जसले गर्दा पर्दाको दृष्टि केन्द्रमा सुजन तथा रक्तश्राव हुन गई दृष्टि कमजोर हुनजान्छ । संसारमा कुल अन्धोपना मध्ये ४ दशमलव ८ प्रतिशत अन्धोपना डाइबेटिक रेटिनोपेथीको कारणले हुने गरेको बताइन्छ ।
