विराटनगरको हिमालय रोड र एमजी रोड कसरी ?

अहिले विराटनगरको हिमालय रोड (जनआन्दोलन चोक)मा नयाँ संरचना तीव्र गतिमा निर्माण भइरहेको छ । यसलाई ग्यान्टोकको सुप्रसिद्ध एमजी रोडसँग निर्माणकर्ता र त्यस्का पक्षधरहरू तुलना गरि रहेका छन्। एमजी रोड गहनाको रूपमा आफ्नो सौन्दर्य र गरिमाको साथ शहरको करिव करिव मध्य उत्तर भागमा अवस्थित छ। होटेल, रेष्टरेन्ट र अन्य फेन्सी/एन्टीक गुड्सको निम्ति यो रोड विश्व प्रसिद्ध छ।अझ इभिनिङ ह्याङ आउटको रूपमा यसको विशिष्ट पहिचान र महत्व छ। तर एमजी रोडको दशांश पनि भूगोल नओगटेको विराटनगरको हिमालय रोड शहरकै सबैभन्दा महत्वपूर्ण इन्ट्री पोइन्ट हो ।

यति सानो भूगोलमा वाकिङ रोड बनाउँछु भन्नु वौद्धिक टाट पल्टाईको चरम उत्कर्ष हो । व्यापार, ट्राफिक व्यवस्थापनमा यसले पार्ने साइड इफेक्टबारे विल्कुलै सोचिएको पाईएन । साथै यो विगतका विभिन्न आन्दोलन–जनआन्दोलनलाई स्पेश दिएको गौरवपूर्ण ईतिहास बोकेको ठाउँ हो । त्यसै यो भूभागलाई जनआन्दोलन चौक भनिएको होइन । रथयात्रामा सबभन्दा बढी भक्तजनहरू यहाँका सडक पेटी तथा घरका छतहरूमा उभिएका हुन्छन्। यसको बिरासत, इतिहास मेटिनु हुन्न । लोकतन्त्रमा सनकका भरमा गलत, कुरूप र अ‍ौचित्यबिहीन राजनैतिक निर्णयहरू जनतामा थोपरिनु हुन्न ।

विराटनगरका बौद्धिक, सामाजिक, राजनीतिककर्मीहरू, पत्रकार तथा अन्य सरोकारवालाले बोल्न ढिलो भएन ? के कारणले मुखमा बुजो लागेको हो ? यो चुप्पिको मनोविज्ञान (साइकोलोजी अफ साइलेन्स) बाट बाहिर निस्कौं मित्रहरू ! नत्र भने भावी पुस्ता र ईतिहासले हामीलाई सराप्ने छ। जय होस विराटनगर र विराटनगरबासीको !!!

नोट : श्रेष्ठको सामाजिक संजालमा व्यक्त विचार साभार गरिएको ।