विराटनगर । विराटनगरमा जारी अन्तरकलेज लिगकम नकआउट फुटबल प्रतियोगितामा कान्तिपुर र कोसी कलेज विजयी हुँदै सेमिफाइनलमा प्रवेश गरेका छन् ।
सोमबार भएको खेलमा विराटनगरको कोसी मल्टिपल कलेजले रंगेलीको जनप्रिय माविलाई र विराटनगरको कान्तिपुर कलेजले दुहबीको महेन्द्र मेमोरियल एकेडेमीलाई पराजित गर्दै सेमिफाइनलमा प्रवेश गरेका हुन् ।
विराट बुद्ध स्पोर्ट्स क्लबले विराटनगरस्थित डिग्री कलेजको मैदानमा आयोजना गरेको प्रतियोगिता अन्तर्गत समूह ‘बी’ तर्फका सम्पूर्ण खेल सम्पन्न भएका छन् । लिग चरणमा समूहको कान्तिपुर पहिलो र गोल एभरेजका आधारमा कोसी दोस्रो भएको छ । कोसी र महेन्द्रको बराबरी ४–४ अंक भएपछि गोल एभरेजका आधारमा कोसी दोस्रो भएको हो ।
प्रतियोगिताको पहिलो खेलमा कोसीका रितिक खड्काको ४ गोल मद्दतले जनप्रिय माविलाई ७–० को फराकिलो गोलअन्तरमा हराउँदै सेमिफाइनलमा प्रवेश गराएका थिए । टिमका लागि पर्शु राई र कासिम राईले थप गोल गरे । खेलको म्यान अफ द म्याच रितिक खड्का भए । उनले नगद ३१ सय रुपैयाँ प्राप्त गरे ।
दोस्रो खेलमा कान्तिपुर कलेजले महेन्द्र मेमोरियल एकेडेमीलाई ३–० गोलमा पराजती गरी अन्तिम चारमा स्थान पक्का गरेको हो । टिमका लागि विवेक चौधरी, सन्तोष श्रेष्ठ र रोमन भुजेलले गोल गरे । खेलको म्यान अफ द म्याच कान्तिपुरका विवेक चौधरी भए । उनले नगद ३१ सय रुपैयाँ प्राप्त गरे ।
प्रतियोगिताको सेमिफाइनल खेलअन्तर्गत बुधबारको पहिलो खेल निहारिका र कोसी कलेज तथा दोस्रो खेल कान्तिपुर र ग्रिनल्याण्ड कलेजबीच हुने आयोजकले जनाएको छ ।
