काठमाडौं । एक जमानाका चर्चित र स्टाइलिस गायक मानिएका बरिष्ठ संगीतकार एवं गायक प्रेमध्वज प्रधानको आज बिहान निधन भएको छ ।
सास फेर्न गाह्रो भएको र छातीमा समस्या देखिएपछि उनलाई बिहानै बसुन्धरास्थित न्यूरो अस्पताल पुर्याइएको थियो । अस्पतालमा उपचारको क्रममा उनको बिहान करिब १ः४५ बजे तिर निधन भएको पारिवारिक स्रोतले जनाएको छ ।
प्रधानका ‘घुम्तीमा नआउ है’, ‘तिमीलाई अचेल कहाँ देखुँ’, ‘गोरेँटो यो गाउँको’, ‘पर लैजाउ फुलहरू’ जस्ता थुप्रै हिट गीत अहिले पनि धेरै सुनिने गरिन्छ । वि.सं. १९९४ सालमा सिन्धुपाल्चोक जिल्लाको चौतारामा बुबा रत्नध्वज प्रधान र आमा प्राणदेवी प्रधानको कोखबाट जन्मिएका उनको घरमै सांगीतिक माहोल थियो । उनको जिजुबाजे नारायणकृष्ण प्रधान र बाजे उत्तरध्वज प्रधान शास्त्रीय संगीतका गहिरो रुची राख्थे ।
