विराटनगर । विराटनगर विमानस्थलमा कोरोना भाइरसको संक्रमण जाँच गर्न हेल्थ डेस्क स्थापना भएको छ । प्रदेश १ का सामाजिक विकास मन्त्रालय र विराटनगर महानगरले यात्रुहरुको स्वास्थ्य जाँचका लागि मंगलबार हेल्थ डेस्कको स्थापना गरिएको हो ।
सामाजिक विकास मन्त्री जीवन घिमिरे र विराटनगर महानगरका प्रमुख भीम पराजुलीले संयुक्त रुपमा हेल्थ डेस्क उद्घाटन गर्नुभयो ।
हेल्थ डेस्कमा महानगरका ४ र स्वास्थ्य कार्यालय मोरङका २ गरी ६ स्वास्थ्यकर्मीलाई खटाइएको छ। ३÷३ जनाको दुई टोली बनाएर विमानस्थलबाट आउने र जाने बिरामीको स्वास्थ्य जाँचका लागि खटाइएको प्रदेश १ स्वास्थ्य निर्देशनालयका निर्देशक चन्द्रदेव मेहताले जानकारी दिनुभयो ।
प्रदेश १ ले भद्रपुर विमानस्थलमा पनि हेल्थ डेस्क स्थापन गरेर यात्रुहरुको स्वास्थ्य जाँच गरिरहेको छ। विदेशबाट आउने यात्रुहरुमा कोरोना भाइरसको संक्रमण भए नभएको पत्ता लगाउन प्रदेश सरकारले विराटनगरको रानी, झापाको भद्रपुर र काँकडभिट्टा तथा इलामको पशुपतिनगरमा समेत हेल्थ डेस्क स्थापना गरेर स्वास्थ्य परीक्षण गरिरहेको छ।
