विराटनगर । माछा व्यवसाय गर्दा प्रहरीले अनावश्यक रुपमा दुःख दिने गरेको व्यवसायीहरूले गुनासो गरेका छन् । कानूनी प्रक्रिया पूरा गरि राज्यलाई राजस्व तिरेर माछा बिक्री गर्न खोज्दा पनि प्रहरी प्रशासनबाट अवरोध गरेर दुःख दिने गरेको गुनासो माछा व्यापारीले गरेका हुन् ।
भन्सार तिरेर आयत गरिएको माछा बिक्रीको लागि काठमाडौं पठाउने क्रममा बाटोमा माछा बोकेको गाडी नियन्त्रणमा लिएर सुनसरी प्रहरीले दुःख दिने गरेको माछा व्यापारीले गुनासो छ ।
विराटनगरको एसजीआई एग्रो प्रालिले ५ लाख ३३ हजार ७ सय ६० रुपैयाँमा १ हजार ९ सय २० केजी रहु, पंगास र रुपचन्द नामको माछा आयात गरेको थियो । नेपालमा माछाको आयात गर्ने विराटनगरका माछा व्यवसायी एहसान शेखले माछाको ६६ हजार रुपैयाँ राजस्व विराटनगर भन्सार कार्यालयलाई बुझाएको छ ।
भारतदेखि आयत गरेको माछा विराटनगर ल्याएपछि व्यापारी शेखले माछा काठमाडौंका खुद्रा व्यापारी धनुषा फिस हाउसलाई बुधबार राति ८ बजे पठाएको थियो । ‘राति ११ बजे भाण्टाबारी प्रहरी चौकी सुनसरीको प्रहरीले रोक्यौं । हामीसँग सबै कागजपत्र थियो । तर, माछा प्रहरीले भाण्टाबारी प्रहरी चौकीमा लिएर गयो,’ माछा व्यवसायी शेखले भने, ‘प्रहरीले रातभरी चौकीमा राखेर बिहीबार बिहान मात्र माछाको गाडी लैजान दिएको छ ।’
सबै कागजपत्र हेरेपछि कुनै कैफियत नभेटेपछि माछा र गाडी छोडेको उनले बताए । उनले सरकारलाई राजश्व तिरेर दर्ता भएको संस्थाले बिक्री गर्दासमेत प्रहरी–प्रशासनबाट अवरोध सिर्जना भएको गुनसो गरे ।
‘सरकारको मापदण्डअनुसार राजस्व बुझाउँछौँ । प्रक्रिया पूरा गरि माछा बिक्री गर्न लैजान प्रहरीले दुःख दिने गरेको छ,’ उनले भने, ‘गाडी रातभरी राखेर विहानी पख आइसभित्र राखेको प्याकेटको माछा खोलेको थियो । यसरी प्याकेट खोलेपछि आइस पलिएर माछाको गुणस्तर घट्छ । जसले गर्दा व्यवसायीलाई नोक्सानी हुने गरेको छ ।’
उनले वैधानिक तरिकाले गर्दै आएको व्यवसायमा प्रहरीले असहयोग गरेको गुनासो गरे । ‘हामीले वैधानिक तरिकाले गरेको व्यवसाय फस्टाएको यहाँका प्रहरी–प्रशासनलाई पचेन जस्तो छ,’ उनले भने ।
देशलाई आर्थिक रूपमा सबल बनाउन थालिएको व्यवसायमा सरकारी पक्षबाट अवरोध सिर्जना भएपछि माछा व्यवसायिकलाई प्रहरी प्रशासनले हतोत्साहित बनाएको व्यवसायीको भनाई छ । काम गरेर खान्छौँ भन्दा उल्टै अवरोध सिर्जना गरेर हतोत्साहित बनाउने काम प्रहरी–प्रशासनले गरेको उनले बताए । ‘हामीलाई सरकारले केही दिनुपर्दैन, स्वतन्त्र रूपमा व्यवसाय गर्न वातावरण दिए पुग्छ,’ उनले भने, ‘कर तिरेर वैधानिक रूपमा व्यवसाय गर्दा पनि सरकारी पक्षबाट नै अवरोध हुने गरेको छ ।’
जिल्ला प्रहरी कार्यालय सुनसरीका प्रवक्ता डिएसपी नरेन्द्र कुमार कार्कीले प्रतिबन्धित माछाहरू आउने क्रमम बढेकोले प्रहरीले नियमित चेकजाँच गरिरहेको बताए । भाण्टावारी प्रहरी चौकीका सइ सुरज खवासले बिगतमा पनि प्रतिबन्धित माछा आयात हुने गरेकोले नियमित चेकजाँचको क्रममा शंकालागेपछि गाडी रोकेको बताए ।
‘ठूलो परिमाणमा माछा आयात भएको थियो । त्यहि भएर चेकजाँच गरिएको हो । प्रहरीले गर्ने चेकजाँचलाई लिएर दुःख मान्नु हुदैन,’ उनले भने, ‘रातको समय भएकोले विहानीपख व्यवसायीको उपस्थितमा माछा चेकजाँच गरि प्रक्रिया पुरा गरेर सम्पूर्ण जागतजा पूरा भएको पाइएपछि माछा छोडिएको हो ।’
