विराटनगर । प्रदेश १ सरकार अन्तर्गतको मनमोहन प्राविधिक विश्वविद्यालय र करुणा फाउण्डेसनबीच शीपमुलक तालिम तथा श्रोत केन्द्र सञ्चालनका लागि सम्झौता गरिएको छ ।
विश्वविद्यालय अन्र्तगतको विराटनगर १४ मा रहेको विराट क्याम्पसको भवनमा विभिन्न शीपमुलक तालिम सञ्चालन गर्न ५ वर्षका लागि फाउण्डेशनसँग सम्झौता गरिएको हो ।
प्रदेश सरकार सामाजिक विकास मन्त्रालय र करुणा फाउण्डेसनको सहकार्यमा सञ्चालित अपाङ्गता पुनस्र्थापना सम्बन्धि कार्यक्रमका विभिन्न शीपमुलक तालिम र विश्वविद्यालयका शीपमुलक तालिम सञ्चालनका लागि २०८२ भदौ मसान्तसम्मका लागि सम्झौता गरिएको विश्वविद्यालयका प्रशासन प्रमुख मदन प्रधानले जानकारी दिनुभयो । सम्झौता अनुसार विराट क्याम्पसको भवनमा तालिम तथा श्रोत केन्द्र सञ्चालनका लागि आवश्यक मर्मतको कार्य करुणा फाउण्डेसनले गर्ने भएको छ । फाउण्डेसनले मर्मतका लागि करिव ५० लाखको लागत स्टिमेट तयार गरेको छ ।
सम्झौता कार्यक्रममा सामाजिक विकासमन्त्री तथा विश्वविद्यालयका सहकुलपति जीवन घिमिरे, बुढीगंगा गाउँपालिकाका अध्यक्ष बालचन्द्र माझी, विश्वविद्यालयका प्रमुख सुवास श्री पोखरल, करुणा फाउण्डेसनका सहनिर्देशक योगेन्द्र गिरीलगायतको उपस्थिति रहेको थियो ।
विराटनगर १४ को विराट क्याम्पसको सम्पत्ति र दायित्व मनमोहन विश्वविद्यालयलाई गत भदौ ४ गते हस्तान्तरण गरिएको थियो । विराट क्याम्पसका अध्यक्ष भूराज राईले करिव ४० करोडको सम्पत्ति तथा दायित्व विश्वविद्यालयलाई हस्तान्तरण गर्नुभएको थियो ।
मनमोहन प्राविधिक विश्वविद्यालय अहिले पाठ्यक्रम तयारीमा रहेकाले शैक्षिक कार्यक्रम सञ्चालन गर्न करिव एक वर्ष लाग्ने भएपछि तत्कालका लागि प्रदेश सरकारले शीपमुलक तालिम तथा श्रोतकेन्द्र सञ्चालन गर्न लागेको मन्त्री जीवन घिमिरेले बताउनुभयो । सामाजिक विकास मन्त्रालय र मनमोहन प्राविधिक विश्वविद्यालय अन्र्तगतका तालिम विराट क्याम्पसको भवनबाट सुरु गरिनेछ ।
