सरकारको लोकप्रियता देखेर आत्तिएः प्रधानमन्त्री

ताप्लेजुङ । प्रधानमन्त्री केपी शर्मा ओलीले वर्तमान सरकारको लोकप्रियतालाई देखेर आत्तिएकाहरुले सरकार विरुद्ध नकारात्मक सन्देश फैलाएको दावी गर्नुभएको छ ।

उत्तरी छिमेकी मुलुक चिनसँग जोडिएको ताप्लेजुङको हिमाली गाउँ घुन्सामा स्थापित सामुदायिक स्वास्थ्य एकाइ भवनको सोमबार उद्घाटन गर्दै प्रधानमन्त्री ओली समृद्धिको बाटोमा लागेको सरकार विरुद्ध षड्यन्त्र भइहरेको दावी गर्नुभयो ।

सरकारले गरेको विकास र प्रगति हेरेर तर्सिएका केही मान्छे मुलुकमा अस्थिरता सिर्जना गर्न लागिपरेको प्रधानमन्त्री ओलीको भनाइ छ । कहिले पार्टी अध्यक्षका विरुद्ध, कहिले प्रधानमन्त्रीका विरुद्ध, कहिले लिखित, कहिले छापेर सरकार ढलिहाल्छ भनेर प्रचार गरेको भन्दै उहाँले देशमा स्थिरता आउला भनेर उनीहरु आत्तिएको जिकिर गर्नुभयो ।

सरकारविरुद्ध भइरहेका भ्रमपूर्ण प्रचारको पछि नलाग्न आग्रह गर्दै प्रधानमन्त्री ओलीले लोकतान्त्रिक प्रणालीविरुद्ध र सरकार विरुद्ध भ्रम फैलाउनेहरुलाई सबैले चिन्नुपर्ने बतायउनुभयो । भारतद्वारा मिचिएको भूमि फिर्ता लिन गर्न गरेको प्रयास, भारत र चीन दुवैसँगको सम्बन्धलाई अझ सुधार, बन्द नाका खोल्ने जस्ता कार्यले वर्तमान सरकार सफल रहेको उहाँको भनाइ थियो ।

घुन्साजस्तो दुर्गम गाउँ आगामी तीन वर्षमा सुगममा परिणत हुने दावी गर्दै प्रधानमन्त्री ओलीले यस क्षेत्रको विकासका लागि यातायातलगायत पूर्वाधार निर्माणमा सरकार लाग्ने बताउनुभयो । उहाँले कञ्चनजङ्घामा आउने पर्यटकका लागि लिनुपर्ने विशेष अनुमति प्रावधान खारेज गरिने र पर्यटकका लागि सो क्षेत्र खुला गरिने उहाँले बताउनुभयो ।

घुन्सावासीले राखेका विभिन्न मागलाई सरकारले ध्यान दिनेसमेत प्रधानमन्त्रीको भनाइ थियो । घुन्साबासीले प्रधानमन्त्री ओलीसमक्ष आफ्ना समस्या समेटिएको मागपत्र नै बुझाएका छन् । उनीहरुले पर्यटन प्रवद्र्धनका लागि विशेष अनुमति खारेज गर्नुपर्ने, कञ्चनजङ्घा पदमार्गको स्तरोन्नति गर्नुपर्ने, घुन्सा लघु जलविद्युत्को क्षमता वृद्धि गरी खम्बाचेन, ग्याब्ला र अम्जिलासालगायत गाउँमा विद्युतीकरण विस्तार गर्नुपर्ने जस्ता आग्रह गरेका छन् ।

सो अवसरमा प्रधानमन्त्री ओलीकी पत्नी राधिका शाक्यले घुन्सा आधारभूत विद्यालयका १० विद्यार्थीलाई ५ लाख रुपैयाँको छात्रवृत्ति र जेष्ठ नागरिकलाई कपडा वितरण गर्नुभयो । कार्यक्रममा संस्कृति, पर्यटन तथा नागरिक उड्डयनमन्त्री योगेशकुमार भट्टराई, प्रदेश नं १ का मुख्यमन्त्री शेरधन राई, नेपाल कम्युनिष्ट पार्टीका नेता सुवास नेम्बाङलगायतको सहभागिता थियो ।

घुन्सामा जिल्ला सदरमुकाम फुङलिङबाट पूर्व सांसद, प्रदेश सांसद, गाउँपालिका तथा नगरपालिका प्रमुख, उप–प्रमुख, पार्टी कार्यकर्ता लगायतको टोली पुगेको थियो । प्रधानमन्त्रीको टोलीले चीनसँगको सीमा क्षेत्र ओलाङ्चुङ्गोला क्षेत्रको हवाइ निरीक्षण पनि गरेको थियो ।

घुन्सामा २०७१ सालमा नै सामुदायिक स्वास्थ्य एकाइ स्थापना भएको थियो । सदरमुकाम फुङ्लिङबाट सवारी साधन र पैदल गरी दुई दिनका समयमा मात्र पुगिने घुन्सामा स्वास्थ्यकर्मी नहुँदा स्थानीय र पर्यटक पनि समस्यामा पर्ने गरेका छन् ।