विराटनगर । मोरङ जिल्लाबाट जनता समाजवादी पार्टीको केन्द्रीय कमिटीमा चयन भएकाहरुलाई बिहीबार स्वागत, बधाई तथा सम्मान कार्यक्रम सम्पन्न भएको छ । पार्टीका युवा नेता उमेश यादवले केन्द्रीय समितिमा चयन भएकाहरुलाई स्वागत गर्नुभएको हो ।
गत कात्तिक ३ र ४ गते बसेको केन्द्रिय कार्यकारिणी कमिटीको बैठकले मोरङबाट २९ जना पार्टी सदस्यहरुलाई केन्द्रीय कमिटीमा चयन गरेको थियो । कार्यक्रममा पार्टीका कार्यकारिणी सदस्य युवराज कार्कीले केन्द्रीय कमिटीमा प्रतिनिधित्व गर्ने नेताहरुलाई गमछा ओढाएर स्वागत गर्नुभयो ।
सोही अवसरमा तत्कालिन समाजवादी पार्टीका मोरङ जिल्ला अध्यक्ष राजकुमार यादवले राजनैतिक परिवर्तनका लागी, अधिकार सम्पन्न हुनका लागि तथा शोषित पीडितलाई काँध दिन पार्टीलाई फराकिलो र बलियो बनाउनुको विकल्प नरहेको बताउनुभयो । कार्यक्रममा तत्कालिन राष्ट्रिय जनता पार्टीका नगरअध्यक्ष विनोद गुप्ता, केन्द्रीय सदस्य कामेश्वर रौनियार, जिल्ला उपाध्यक्ष दिनेश शाह तथा जसपा नेपालका केन्द्रीय सदस्य भोगेन्द्र यादव, तेजलाल कर्ण, तवरेज हक, मालबाबु सहनी र मोहम्मद कादिरलगायतको सहभागिता थियो ।
