विराटनगर । विराटनगरमा जारी विराट एक्स्पोमा सहभागीलाई दैनिक चर्चित कलाकारहरूले मनोरञ्जन प्रदान गर्दै आएका छन् ।
साँझदेखि सुरू हुने सांगीतिक कार्यक्रममा युवा पुस्ताको रोजाइमा परेका कलाकारहरूले भरपुर मनोञ्जन प्रदान गर्दै आएका छन् ।
आइतबार साँझ गायिका मेलिना राईले चर्चित गीत प्रस्तुत गरि मनोञ्जन दिइन् । आकर्षक पहिरनमा सजिएर गाउँदै नाच्ने शैली अपनाएकी उनले दोस्रो पटक विराटनगर आएको जानकारी दिँदै आफ्नो प्रस्तुती आरम्भ गरिन् ।
मेलिनाले चलचित्र २ रूपैयाँमा गाएको चर्चित गीत ‘कुटुमा कुटु सुपाडी दाना… बोलबाट सहभागिलाई नचाउन सुरू गरेकी थिइन् । आफु सिंगल रहेको मञ्चबाट जानकारी दिँदै उनले ‘दाह्री फूल्यो वैशाखमा, चस्मा लाउँछौं पावर.. बोलको गीतले सबैलाई जुरुक्क पारिन् । एक दर्जन चर्चित गीतहरू प्रस्तुत गरिरहदा गायिका मेलिनाको गीतमा नाँच्ने युवाहरूको भिड देखिन्थो ।
प्रस्तुतिको बिचमा मेलिनाले गाएको ‘टिकटकमा देखेको तिमीलाई …. बोलको गीतमा सहभागिहरूले छमछमी नाँचे । उक्त गीत प्रस्तुति सकेपछि सहभागिले ‘वान्समोर’ भन्दै चिच्याएपछि मेलिनाले पुनः दोस्रो पटक गाइन् र स्टेजबाट बिदा भइन् ।
उद्योग संगठन मोरङको आयोजनामा विराटनगरमा सुरू भएको विराट एक्स्पोमा दैनिक चर्चित कलाकारहरूको प्रस्तुति रहेको छ । एक्स्पो उद्घाटन भएको शुक्रबार पहिलो दिन गायिका आस्था राउतको प्रस्तुति थियो । उनको प्रस्तुतिमा एक्स्पोमा आएका उपभोक्ता र सहभागीहरूले भरपुर मनोञ्जन प्रदान गरेका थिए ।
यस्तै दोस्रो दिन शनिबार चर्चित गायक प्रमोद खरेलको प्रस्तुति थियो । सार्वजानिक विदाको दिन भएको कारणले गर्दा पनि अन्य दिनको तुलनामा शनिबार उपभोक्ताहरूको उल्लेखनीय सहभागिता थियो ।
गायक खरेलले आफ्नो चर्चित गीतहरू प्रस्तुत गरि सहभागिहरूलाई मनोञ्जन दिए । मंगलबार साँझ चर्चित गायक सुगम पोखरेलको प्रस्तुति रहने बताइएको छ । फागुन १० गतेसम्म सञ्चालन हुने एक्स्पोमा दैनिक चर्चित कलाकारहरूबाट मनोरञ्जन दिनेछन् ।
