नेकपा (माओवादी केन्द्र) का उपमहासचिव तथा माओवादी केन्द्र प्रदेश–१ का इन्चार्ज हरिबोल गजुरेलले माओवादी नयाँ क्रान्तिको बाटो कोर्दै अघि बढेको बताएका छन् । शनिबार एकीकृत अखिल शिक्षक संगठन कटारी नगरपालिकाको दोस्रो नगर परिषद् कार्यक्रममा बेतेनीमा यस्तो बताएका हुन् ।
उनले भनेका छन्, ‘माओवादी क्रान्तिको बाटो कोर्दै हिडेको छ । हिजोको क्रान्तिको बाटो अब हिडेर गन्तव्यमा पुग्न सकिदैन । अब एकाइसौँ शताब्दीको मूल्य, मान्यता, विशेषता भएको हुनुपर्छ ।’
गजुरेलले पार्टी भनेको जीवन भएको बताउँदै भने, ‘मान्छेको जीवनमा बिरामी हुन्छ । स्वास्थ्य हुन्छ । फेरि बिरामी हुन्छ । कहिले बिरामी नहुने त हुँदैन होला ! पार्टी पनि त्यस्तै हुन्छ । पार्टी जीवनमा उत्तार चढाव हुन्छ ।’
उनले अहिले माओवादीमा क्रान्तिको बाटो कोर्दै हिड्नु पर्ने बाध्यता रहेको बताए । प्रष्ट पार्दै भने, ‘यहाँ कसैले पनि माओवादीको लागि बाटो कोरिदिने वाला छैनन् । हिजोको क्रान्तिको मोडेलले काम दिँदैन । हिजोको चीन र रुसको मोडल यहाँ बनाएर हुँदैन । अहिलेको एकाइसौँ शताब्दीको विशेषता अनुसारको पार्टी, विचार चाहिन्छ । त्यसको लागि क्रान्तिको गोरेटो कोर्दै हिड्नु पर्ने अवस्था छ । अरुले बनाइदिएको बाटोमा छिटो पुगिन्छ । आफूले बनाउँदै हिडेको बाटोमा ढिलो पुगिन्छ ।’
माओवादीमा अहिले पार्टी र विचार निर्माण गर्ने काम सुरु भएको उद्घोष गरेका छन् । उनले भने, ‘हिजो युद्ध गरेका पार्टीहरु युद्ध गर्दा गर्दै सिद्धिएका छन् । कोही शान्ति प्रक्रियामा आएर बिना उपलब्धी सिधिएका छन् । माओवादीले युद्ध पनि लड्यो । शान्ति प्रक्रियामा पनि आयो । केही उपलब्धी पनि हाँसिल गरेको छ । उनले भने, ‘कुन राम्रो त ? युद्ध लडेको लडेको सिद्धिनु की ? उपलब्धीसँगै शान्ति प्रक्रियामा आउनु ?’
उनले माओवादी अहिले पनि नेपाली राजनीतिको केन्द्र भागमा रहेको बताउँदै माओवादीकै एजेन्डामा संविधान बनेको दाबी गरे । उनले भने, ‘यसलाई हामीले गर्व गर्नुपर्छ। तर, हामीले गरेकै काम जनताको बीचमा पुरा भएका छैनन्। हिजो हामीले जनताको बीचमा जे जे कुरा गरेका थियौँ । अहिले माओवादीले त्यही त्यही कुरा गरेको छ ।’
उनले थप्दै भने, ‘हिजो हामीले सुख सुविधाका कुरा, नाताबाद, कृपावादका, भ्रष्टचार, अनियमितताका कुराको विरोध गर्यौँ । आज जनताले माओवादीलाई यही आरोप लगाउँदै छन्। यहीबाट ठूलो घाटा माओवादीलाई छ । माओवादी भएर यस्तो गर्ने ? हिजो विरोध गर्ने ? आज आफु त्यस्तै हुने भन्ने कुरा गर्दै छन्। यो व्यवहारिक कुरा हो । यो व्यवहारिक कुरा जनताले विचार र राजनीतिसँग जोडेर बुझदैनन् । त्यसको लागि अहिले माओवादी विचार पार्टी निर्माण गर्ने र नयाँ क्रान्तिको बाटो कोर्ने अभियानमा छ ।’
उक्त कार्यक्रममा माओवादी केन्द्रका केन्द्रीय सदस्य मोहनबहादुर खत्री, केपी बराल, माओवादी केन्द्र उदयपुरका जिल्ला संयोजक विनोद कटुवाल दिवशलगायतको उपस्थिति रहेको थियो ।
