विराटनगर ।औद्योगिक नगरीको रूपमा परिचित कोशी प्रदेशको राजधानी विराटनगर उच्च शिक्षा अध्ययन गर्ने शहरको रूपमा परिचित छ ।
कलेजहरूमा सबै विषयका उच्च शिक्षाको पढाई हुने भएकोले पनि विराटनगर शैक्षिक हबको रूपमा विकास हुँदै गएको छ ।
विश्व विद्यालय र पूर्वाञ्चल विश्वविद्यालयबाट सम्बन्ध प्राप्त गरी विराटनगरका कलेजहरूले उच्च शिक्षाको पढाइ सञ्चालन गर्दै आएका छन् । विद्यार्थीले रोजेको विषय पढ्न पाइने भएकोले पनि उच्च शिक्षा अध्ययन गर्ने विद्यार्थी अन्यत्र जानु पर्दैन ।उच्च शिक्षाका लागि गुणस्तरीय शिक्षा दिने संस्थाहरू खुलेसँगै विराटनगरले शैक्षिक क्षेत्रमा फड्को मारेको छ । शैक्षिक गुणस्तरदेखि सुविधा सम्पन्न भौतिक पूर्वाधारहरू निर्माण हुन थालेपछि काठमाडौं जाने विद्यार्थीहरूको रोजाइ विराटनगरका नाम चलेका कलेजहरू बन्न थालेको हो । विगतमा सरकारीस्तरका क्याम्पसले भरथेग गरेको यहाँको उच्च शिक्षाको बागडोर अहिले निजी क्षेत्रका कहलिएका कलेजले सम्हालेका छन् ।
कुनै समय उच्च शिक्षा हासिल गर्न विद्यार्थीहरू काठमाडाँै धाउने गरेका थिए । तर, अहिले ठूलो परिवर्तन भएको छ । गुणस्तर र पूर्वाधारमा लगानी गरि सुविधा सम्पन्न बन्दै गइरहेको विराटनगरमा अहिले नेपालकै उत्कृष्टभित्र पर्ने कलेजहरु छन् । जसमा व्यवस्थापन, शिक्षा, विज्ञान संकाय र प्राविधिक धारका कक्षाहरु सहज रुपमा विद्यार्थीहरुले पढन पाएका छन् ।
विराटनगरमा एमबीबीएस, एमबीए, बीबीए, ब्याचलर अफ फार्मेसी, ब्याचलर अफ मेडिकल ल्याब टेक्नोलोजी, ब्याचलर अफ पब्लिक हेल्थ, बीएससी नर्सिङ, सफ्टवेयरको पनि पढाइ हुन्छ । त्यस्तै बीई सिभिल, होटल म्यानेजमेन्ट, इलेक्ट्रिकल एन्ड इलेक्ट्रोनिक्स, आम सञ्चार, चिकित्साशास्त्र अर्थात् नर्सिङलगायत पढ्ने सुविधा विराटनगरमा छ । सीटीईभिटी अन्तर्गत विभिन्न प्राविधिक विषय पनि पढाइ हुने गरेको छ ।
विराटनगरमा सरकारी र नीजि तहका राम्रो नतिजा पाईरहेको अवस्थामा निजी क्षेत्रबाट सञ्चालित कलेजहरुले पनि काठमाडौँ सहरको सुविधा प्रदान गरिरहेको शिक्षाविदहरु बताउँछन् । एसईईपछि अध्ययन गर्न सकिने प्राविधिक ल्याबदेखि कम्प्यूटर इन्जिनीयरिङ्ग र सिभिल ईन्जिनीयरिङ्ग सम्मका कक्षाहरु अहिले विराटनगरमा सञ्चालनमा आइरहेका छन् । जसका कारण हिजो घर छोडेर बाहिर जानुपर्ने विद्यार्थीहरुलाई आफ्नो घर आँगनमै प्राविधिक शिक्षा अध्ययन गर्न पाउने खुसीको विषय बनेको छ ।
हरेक वर्ष विराटनगरका निजी कलेजहरुमा ६ देखि ७ हजार विद्यार्थी भर्ना हुने गरेका छन् । विराटनगरमा रहेको दुई दर्जन निजी कलेजहरुमा यस वर्ष शैक्षिक शत्रमा कक्षा ११ मा बढीमा ७ हजार विद्यार्थी भर्ना भएको हिसान कोशी प्रदेशका अध्यक्ष ज्ञानबहादुर खड्काले जानकारी दिए । एसईई दिएर उत्तीर्ण भएका करिब ९० प्रतिशत विद्यार्थी विराटनगरकै निजी कलेज र सामुदायिकमा भर्ना हुने गरेको उनले बताए । शैक्षिक योगदानको कुरा गर्दा निजी क्षेत्रमा पढ्ने विद्यार्थीको संख्या थपिने क्रममा पुगेको छ । ‘हरेक वर्ष विराटनगरका कलेजहरुमा पढने विद्यार्थीहरूको संख्यमा वृद्धि आएको छ,’ उनउले भने, ‘यो राम्रो सुरूवात हो । यहाँका कलेजहरुमा गुणस्तरीय शिक्षा दिनमा अब्बल सावित छन् । त्यही भएर पनि कोशी प्रदेशका मात्र नभए मधेश प्रदेश भरीका विद्यार्थीको रोजाइ विराटनगरका कलेजमा हुने गरेको छ ।’
एसईई उत्तीर्ण गरेर तराई र पहाडी जिल्लाबाटसमेत विद्यार्थीहरू विराटनगर आउने गर्छन् । प्लस टु साइन्स, कम्प्युटर साइन्स, म्यानेजमेन्ट र होटेल म्यानेजमेन्ट पूरा गरेर स्नातक तहको कक्षा पनि यतै लिने आधाभन्दा धेरै छन् । विराटनरले स्नातक तहको पढाइमा पनि मधेश प्रदेशका विद्यार्थीलाई समेत तान्दै आएको छ । प्लस टु गर्न काठमाडौं र भारतको सीमावर्ती सहर जाने चलनमा कमी भएको छ । प्लस टु सकेर स्नातक पनि यतै पढ्ने विद्यार्थीकै कारण यहाँका कलेजमा विद्यार्थीको चाप हुने गर्छ ।
कति विद्यार्थीले दिए प्रवेश परीक्षा ?
एसईई उत्तीर्ण गरेका विद्यार्थीहरुले अहिले आफ्नो रोजाइ अनुसारको कलेजमा प्रवेश परीक्षा दिँदै आएका छन् । विराटनगरका आधा दर्जन बढी कलेजले कक्षा ११ मा भर्ना हुनका लागि प्रवेश परीक्षा लिएका छन् ।बुधबार विराटनगरस्थित शिक्षादीप, कान्तिपुर, अरनिको कलेजले कक्षा ११ मा भर्ना हुनका लागि प्रवेश परीक्षा लिए । यसअघि एभरेष्ट, ग्रिनल्याण्ड कलेजले पनि प्रवेश परीक्षा लिएका छन् ।
शिक्षादीप कलेजले विज्ञान संकायको लागि मात्रै विद्यार्थीको प्रवेश परीक्षा लिएको छ । विज्ञान संकायमा ८ सय जना कोटामा २ हजार ३२७ जना विद्यार्थीले प्रवेश परीक्षा दिएको कलेजले जनाएको छ । बिहीबार व्यवस्थापन संकायको लागि प्रवेश परीक्षा लिने तयारी छ । यसैगरी कान्तिपुर कलेजमा ८५० जनाको कोटामा १ हजार ३३७ विद्यार्थीले प्रवेश परीक्षा दिएको प्रिन्सिपल भुवन नेपालले जानकारी दिए । विज्ञान संकायमा कान्तिपुरमा ३५० जनाको कोटामा ६०३ जना विद्यार्थीले प्रवेश परीक्षा दिएका छन् । त्यसैगरी ३५० जना व्यवस्थापन संकायको लागि लिएको परीक्षामा ४९७ जना र होटल व्यवस्थापनको १५० जनाको कोटाको लागि लिएको परीक्षामा २३७ जना विद्यार्थीले परीक्षा दिएको प्रिन्सिपल नेपालले बताए ।
अरनिको कलेजले विज्ञान विषयमा अध्ययन गर्न ८ सय सिटका लागि १ हजार ९०३ जना विद्यार्थीले परीक्षा दिएका छन् । अरनिको कलेजमा प्रवेश परीक्षा दिएका विद्यार्थीहरूलाई एसईईको अङ्क र प्रवेश परीक्षामा पाएको अङ्कको आधारमा १० हजारदेखि १ लाख रुपैयाँसम्म छुट दिने प्रिन्सिपल राजेश कार्कीले बताए ।
विराटनगर–९ मा रहेको ग्रीनल्याण्ड कलेजले विज्ञान संकायमा ५२५ सिटका लागि ७३७ र व्यवस्थान संकायमा ३५० सिटका लागि ४१४ जना विद्यार्थीले परीक्षा दिएको कलेजका निर्देशक शिवनारायाण यादवले जानकारी दिए ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।