विराटनगर ।कोशी प्रदेशको भौतिक पूर्वाधार मन्त्रालयबाट सरुवा भए पनि रमाना नबुझेपछि मन्त्रालयमा दुई जना सचिवले कामकाज गरिरहेका छन् ।
भौतिक पूर्वाधार मन्त्रालय कोशीबाट डेढ महिना अघि सरुवा भएका मोहन चापागाईँ सरुवा भएको ठाउँमा नगई मन्त्रालयमै बसेपछि एउटै मन्त्रालयमा दुई जना सचिवले काम गर्नुपर्ने परिस्थिति बनेको हो ।
चापागाईँको सरुवा भएपछि सो मन्त्रालयमा सिक्टा सिँचाइ आयोजनाबाट सरुवा भएर रमेशकुमार सिंह मन्त्रालयमा आएका छन् । सरुवा भएर आएका सचिव सिंहले भदौ १० गते मन्त्रालयमा हाजिर गरेका छन् । सरुवा भए पनि अनिवार्य अवकाश हुनैलागेका चापाँगाँई पनि मन्त्रालयमा आउन थालेको र दुवै जनाले मन्त्रालयको काम गरिरहेको कर्मचारीहरूले बताएका छन् ।
भौतिक पूर्वाधार मन्त्रालय कोशीका प्रशासन महाशाखाका प्रमुख रामप्रसाद फुयाँलका अनुसार सरुवा भएर आएका नयाँ सचिव भने बिदामा काठमाडौँ गएका छन् । हिक्मत कार्की मुख्यमन्त्री भएको बेला सात महिना अघि चपाइगाई भौतिक पूर्वाधार मन्त्रालय कोशीमा सरुवा भएर आएका थिए । सो भन्दाअघि पनि चापागाईँ सोही मन्त्रालयमा थिए । रिटार्यड हुन लागेकाले उनले मन्त्रालय नछाडेको पूर्वाधार मन्त्रालयले जनाएको छ ।
कोशी प्रदेशका प्रमुख सचिव डा. दीपक काफ्लेले अनिवार्य अवकाश हुन लागेकाले मोहन चापागाईँ मन्त्रालयमै रहेको बताए । उनले केही दिन भित्रै अनिवार्य अवकाश हुने भएकाले चपाँगाईका विषयमा आफूले धेरै खोजी नगरेको बताए । उनले मन्त्रालयमा दुई सचिवले काम गरिरहेको स्वीकार गरे ।
