विराटनगर । विराटनगरमा सहकारीको नाममा लगानी गरेर मिटरब्याज धन्दा चलाउने गरेको पाइएको छ । अचल सम्पत्ति सहकारीको नाममा धितो राखेर व्यक्तिगतरुपमा करोडौं लगानी गर्ने र मिटरब्याज असुलीको धन्दा चलाउने काममा सक्रिय रहेको गुनासो मंगलबार सार्वजनिक भएको हो । एकजना पीडितले नेपाल पत्रकार महासंघ मोरङको सभाहलमा पत्रकार सम्मेलन आयोजना गरेर सहकारी सञ्चालकले मिटरब्याजको धन्दा चलाउँदा आफूलगायत धेरैजना पीडित भएको खुलासा गरेका छन् ।
विराटनगरमा रहेको लाभा बचत तथा ऋण सहकारी संस्थाका अध्यक्ष विष्णुप्रसाद पोखरेलले सहकारीको नाममा जग्गा दृष्टिबन्धक गरेर उनले करोडौं रुपैयाँ नगद लगानी गरी मिटर ब्याज असुल्ने गरेको विराटनगर ४ का ४५ वर्षे लक्ष्मण घिमिरले बताए । सहकारीको नाममा लगानी गरेपनि पोखरेलले उक्त कर्जा सहकारीको खातामा वा बैंकको चेक मार्फत नगरी नगदै कारोबार गर्ने गरेको घिमिरेले जानकारी दिए ।
घिमिरेले २०७१ सालमा हार्डवेयर व्यवसाय संचालन गर्न पोखरेलबाट ३९ लाख रुपैयाँ कर्जा लिएका थिए । सहकारीबाट कर्जा लिएका घिमिरेले धितो सहकारीकै नाममा दिए । उनले मोरङको ग्रामथानमा रहेको १ बिघा १६ कठ्ठा र बुढीगंगामा रहेको ४ कठ्ठा जग्गा सहकारीको नाममा धितो पास गरिदिएका थिए । तर सहकारी सञ्चालकले सहकारीको खातामा कर्जा बापतको रकम जम्मा गरेनन् । सहकारीको नाममा कर्जा लगानी गरेको रकम बराबरको अन्य बैंकको चेक पनि दिएनन् बरु नगदै घरमा पु¥याइदिए ।
पोखरेलले ३९ लाख रुपैयाँ ऋण दिएको भएपनि पछि कपाली तमसुकमा ३ करोड ऋणको बनाएको उनले बताए । ०७१ सालमा लिएको ३९ लाख रुपैयाँ ऋण विभिन्न मितिमा पटक पटक गरी ७ करोड रुपैयाँ तिरेको घिमिरेले दाबी गरेका छन् । ‘३९ लाखको ऋण ७ करोड तिरिसकें । अझै ६ करोड तिनुपर्ने भनिरहेका छन् । ऋणको साँवा र ब्याज तिरिसक्दा भएको हार्डवेयरको पसल र अरु सम्पत्ति सक्किसक्यो, भएको सम्पत्ति बेचेर म सडकमा आइसकें । अझै ६ करोड बुझाए मात्र जग्गा फिर्ता गर्छु भनिरहेका छन् । अब मेरो तिर्ने सामथ्र्य सकिइसकेको छ । तर, उनीबाट निरन्तरको टर्चर थेक्नै नसक्ने गरी आइरहेको छ,’ पत्रकार सम्मेलन गर्दै घिमिरेले भने ।
भएको सम्पत्ति सकिएपछि बाध्य भएर मिटरब्याजीलाई कारवाहीको माग गर्दै प्रक्रिया सुरु गरेको उनले बताए । घिमिरेले सहकारीका अध्यक्ष पोखरेल र सहकारीविरुद्ध जिल्ला प्रशासन कार्यालय मोरङमा उजुरी दिएका छन् । ‘ऋण तिर्दातिर्दा भएको सम्पत्ति सबै रित्तियो । तर ऋण अझै बाँकी छ भन्न साहुहरूले कहिल्यै छोडेनन्,’ उनले भने, ‘३९ लाख ऋणको ७ करोड तिर्दासमेत कहिल्यै ऋण चुक्ता ंभएन ।’ साहुले अझै साँवा र ब्याज गरेर ६ करोड बाँकी रहेको भन्दै आफूलाई सो रकम तिर्न ताकेता गरिरहेको उनको गुनासो छ । ताकेता गरेर हैरान बनाएपछि उनले कानुनी उपचारको सहारा खोज्दै उजुरी दिएका हुन् ।
यता सहकारीका अध्यक्ष पोखरेलले ऋण तिर्न नसकेपछि घिमिरेले आफूलाई आरोप मात्र लगाएको बताए । विधि र प्रक्रियासंगत तरिकाले ऋण लगानी गरेको उनले बताए । ‘अहिले आएर साँवा र ब्याज तिर्न नसकेपछि उल्टै सहकारीको बदनाम गराउँदै हिडेको हो,’ उनले भने ।
गृह मन्त्रालयले मिटरब्याज पीडितलाई प्रशासनमा उजुरी दिन आव्हान गरेपछि जिल्ला प्रशासन कार्यालय मोरङमा मात्र २२० जना मिटरब्याज पीडितले निवेदन दर्ता गराएको सहायक प्रमुख जिल्ला अधिकारी प्रदीप साहले जानकारी दिए । प्रशासनमा दर्ता भएका २२० मध्ये ५७ वटा निवेदन उपर दुवै पक्षबीच सहमति भएको छ । १५ वटा निवेदन दुवै पक्षबीच सहमति बन्न नसकेपछि अदालत पठाएको उनले बताए । १६३ निवेदन बिचारधीनमा रहेको छ ।
