विराटनगर । एक जना प्रहरी जवानको ज्यान जाने गरी आइतबार मोरङको लेटाङमा भएको घटनामा संलग्न ६ जनालाई प्रहरीले नियन्त्रणमा लिएको छ ।
उनीहरुको पहिचान भने प्रहरीले खुलाएको छैन । मोरङका प्रमुख जिल्ला अधिकारी काशीराज दाहालले घटनामा संलग्न रहेको आशङ्कामा ६ जनालाई नियन्त्रणमा लिइएको जानकारी दिए ।
‘प्रहरीले घटनाको अनुसन्धानको लागि ६ जनालाई नियन्त्रणमा लिएर अनुसन्धान सुरु गरेको छ,’ मोरङका प्रमुख जिल्ला अधिकारी काशीराज दाहालले भने, ‘शंकास्पद व्यक्तिहरुलाई पनि नियन्त्रणमा लिएर अनुसन्धान प्रक्रिया अगाडि बाढाएको छ ।’
खेरुवास्थित शिक्षा विकास माविका एक शिक्षकले १२ वर्षीया बालिकालाई यौन दुर्व्यवहार प्रयास गरेको विषयमा आइतबार भएको सर्वपक्षीय छलफलमा आक्रोशित भीडको आक्रमणमा परेर महिला प्रहरी उर्मिला श्रेष्ठको मृत्यु भएको थियो । भीडले उनको घाँटी र छातीमा छुरा प्रहार गरेको थियो । घटनास्थलमा पुगेका मोरङ प्रहरी प्रमुख एसपी जनार्दन जिसीसहित २५ जना प्रहरी र ७ जना स्थानीय झडपमा परि घाइते भएको १ नम्बर प्रदेश प्रहरी कार्यालय विराटनगरका प्रवक्ता एसपी नविनराज राईले जानकारी दिए ।
घटनालाई राजनीतिक इस्यु नबनाउन आग्रह
मोरङको लेटाङ नगरपालिकाका प्रमुख शंकर राईले आइतबारको घटनालाई लिएर राजनीतिक रंग दिन नहुने बताएका छन् ।
तपाइँको नजरमा ‘आइतबार दिनभर त्यहाँ के भयो ?’ भन्ने प्रश्नमा उनले विद्यालय व्यवस्थापन समिति र प्रधानाध्यापकबाटै गल्तीको सुरुवात भएको दाबी गरे । घटनामा संलग्न शिक्षक, उनलाई बचाउन खोज्नेहरू तथा प्रहरीको हत्यामा संलग्न सबैलाई जुनसुकै अवस्थामा पनि पक्राउ गरेर कानूनी दायरामा ल्याउनु पर्नेमा उनले जोड दिए ।
घटनालाई शान्त बनाउन र अरु अप्रिय घटना हुन नदिनका लागि लेटाङमा रहेका राजनीतिक दल, प्रहरी प्रशासनसहितको बैठक आयोजना गरिएको बताउँदै राईले अराजक समूहले कसैको कुरा नसुन्दा घटना भएको पनि बताए ।
प्रस्तुत छ राईसँग टेलिफोनमा गरिएको कुराकानीः
मेरो दाई भरतपुर मा विरामी हुनुहुन्थ्यो र म त्यता गएको थिएँ । घटनाको विषयमा अपडेट थिएँ । लेटाङमा सिडियो सावसहित जनप्रतिनिधि बसेर छलफल भइरहेको थियो, म पनि फोनमा निरन्तर कन्ट्याक्टमा थिएँ । घटना चाहिं एउटा शिक्षकले एउटा विद्यार्थी (छोरी जस्तो)लाई होलीको समयमा पनि र त्यस अगाडि पनि पटक–पटक जबर्जस्ती करणी गर्न खोज्दो रहेछ । एक पटक मात्रै होइन धेरै पटक त्यस्तो घटना भएको रहेछ । त्यसपछि त्यो नानीहरुले विद्यालय व्यवस्थापन समिति र हेडसरलाई भनेको पनि रहेछ । तर, उनीहरुले शिक्षकको बेइज्जत हुनेभयो भनेर लुकाउने प्रयास गरेका रहेछन् । पटकपटक भन्दा पनि कुनै कारबाही नभएपनि छात्राहरुले अभिभावकलाई भनेछन् । त्यसपछि हल्ला फैलियो । धेरै हल्ला फैलिएपछि अभिभावक र विद्यार्थीले ती शिक्षकलाई जुत्ताको माला, कालोमोसो दल्ने, कारबाही गर्नुपर्ने भन्ने माग गरेर प्रदर्शन गरेका थिए । त्यही अवस्थामा भीड कन्ट्रोल हुन सकेन । त्यसकारण महिला प्रहरीको मृत्यु भयो । यो ठूलो अपराधिक काम भयो, अराजकता भयो । हामीले शिक्षकलाई कारबाहीको दायरामा ल्याउँ भनेका थियौं । वडाध्यक्ष तथा उपप्रमुखहरु पनि घटनास्थलमा जानुभएको थियो । तर, स्थानीय युवाहरुले बोल्ने जनप्रतिनिधिलाई, शिक्षकलाई, अगुवा युवाहरुमाथि नै जाइलाग्ने अवस्था थियो । धेरैले हिंजो कुटाइ पनि खाए । अहिले लेटाङमा कफ्र्यु लागेको छ । सम्बन्धीत अपराधिलाई जहाँ भएपनि नछोड्ने गरी छलफल भइरहेको छ ।
हिंजो म यहाँ नभएकोले गर्दा सूचना धेरै आएको छैन । तर, के हो भने विद्यार्थी बालिकालाई पटकपटक आक्रमण गरेको सूचना हेडसर र व्यवस्थापन समितिलाई सूचना दिँदा पनि मिलाउने प्रयत्न गरेको देखियो । तर, शिक्षकले नै अपराधिक गतिविधि जारी राखेको कारण यस्तो घटना भएको छ । त्यो पनि गलत भयो । हामीले त्यसखालको घटनालाई ढाकछोप गर्नेलगायत सबैलाई कारबाही हुनुपर्छ भनेका छौं ।
अपराधि जोसुकै भएपनि सजाय हुनुपर्छ । गल्ती गरेकोलाई सजाय हुनुपर्छ । घटनालाई राजनीतिक इस्यु बनाउनु हुँदैन । जो अपराधि छ त्यो अपराधिलाई कानूनी कारबाहीको दायरामा ल्याउनु पर्छ । प्रहरीलाई धेरै खटाउने र यातायातको सुविधा दिनुपर्छ । उहाँहरुको यातायातमा समस्या देखिएको छ । हामी सबै राजनीतिक दलहरु बसेर घटना न्यूनीकरण र यसखालका घटना पुनः दोहोरिन नदिनका लागि छलफल गरिरहेका छौं ।
