विराटनगरका किराना पसलमा भारतबाट तस्करी गरेर ल्याएको खाद्यवस्तु विक्री

विराटनगर । प्रदेश १ को राजधानी विराटनगर सहरमा रहेका खुद्रा किराना पसलहरूमा भारतदेखि अवैध रुपमा तस्करी भएर आएको खाद्यवस्तुहरू बिक्री वितरण गर्ने गरेको पाइएको छ ।

सीमावर्ती बजार जोगवनीदेखि अवैध रुपमा भन्सार छली गरेर ल्याएको खाद्यवस्तुहरू विराटनगरका खुद्रा पसलहरूमा ल्याएर बिक्री वितरण गर्ने गरेको अनुगमनको क्रममा भेटिएको हो ।

उद्योग, वाणिज्य, आपूर्ती तथा उपभोक्ता संरक्षण कार्यालय विराटनगरको नेतृत्वमा गरेको बजार अनुगमनको क्रममा यहाँका खुद्रा पसलका व्यापारीहरूले क्यारिङ्ग मार्फत भन्सार छली गरेर ल्याएको खाद्यबस्तुहरू लिने गरेको फेला परेको हो । उनीहरूले ल्याएको खाद्यवस्तुको बिल बिजक देखाउन नसक्दा विराटनगरका तीन वटा खुद्रा पसल कारवाहीमा परेको छ ।

यसरी कारवाहीमा पर्नेहरूमा विराटनगर–९ बी प्लटभित्र रहेको मोनिका पूजा एवं किराना पसल, गणेश किराना भण्डार र ओम शान्ति किराना पसल रहेका छन् । उनीहरूको पसलमा रहेको खाद्यवस्तुको बिल बिजक नदेखाएपछि कारवाही गरिएको उद्योग, वाणिज्य, आपूर्ती तथा उपभोक्ता संरक्षण कार्यालय विराटनगरका निमित्त कार्यालय प्रमुख सन्तोष पोखरेलले जानकारी दिए ।

कारवाहीमा परेका पसलहरूलाई वाणिज्य कार्यालयले उपभोक्ता संरक्षण ऐन २०७५ अनुसार कारवाहीको दायरमा ल्याएको उनले बताए । वाणिज्य कार्यालयले मोनिका पूजा एवम् किराना पसललाई २० हजार रुपैयाँ, गणेश किराना भण्डार र ओम शान्ति किराना पसललाई जनही १०÷१० हजार रुपैयाँ जरिवना गराएको हो । खुद्रा पसलहरूमा तस्करी भएर चिनी, दाल, बिस्कुट, पापडलगायतका खाद्यवस्तु आउने गरेको पाइएको छ ।

व्यापारीहरूले जोगवनीमा गएर खाद्यवस्तु खरिद गर्ने र उनीहरूले क्यारिङ गर्नेलाई सामान पसलसम्म ल्याउने जिम्मा दिने गर्दछन् । व्यापारीले पसलसम्म खाद्यवस्तु ल्याउन क्यारिङ गर्नेलाई निश्चित रकम दिने सहमति हुने गर्दछ । सहमति अनुसार क्यारिङ गर्नेले पनि भरिया प्रयोग गरेर गन्तव्यसम्म ल्याउने गर्दछन् । यसरी क्यारिङमार्फत भारतदेखि खाद्यवस्तुको तस्करी गरि बिक्री वितरण सबैभन्दा बढी विराटनगरको पुरानो गुद्री र नयाँ गुद्रीका होलसेल र खुद्रा पसलका व्यापारीहरूले गर्ने गरेको स्रोतले जानकारी दिएको छ । दैनिक यहाँका पसलहरूमा तस्करीको लाखौं मूल्य बराबरको खाद्यवस्तु क्यारिङ गर्नेले लिएर आउने गरेको छ । क्यारिङ गर्नेलाई व्यापारीले पिस हिसाले भुक्तानी दिने गर्दछन् ।

यस्तै अनुगमनको क्रममा विराटनगर–९ मा रहेको टाटा किराना पसलमा खाद्यवस्तु म्याद सकिएको भेटिएको थियो । म्याद सकिएको मसला, पाउडरलगायतका ५ हजार ४ सय मूल्य बराबरको खाद्यवस्तु अनुगमन टोलीले नष्ट गरेको छ । अनुगमन टोलीमा जिल्ला प्रशासन कार्यालय, उपभोक्तावादी संघसंस्थाका प्रतिनिधिको उपस्थित थियो ।